An i organizacia taro ERIO an o Brisel avdive ikergja pe konfrencia anavkerdi sar " Majzoralo politikano leiba than e Romenge"
I tema sine ki savi forma te vazdel pe o nivelo politikane leiba than e Romenge ko aniba decizie. Plo than pali akharin lelja thaj o Prezidento taro IRU o Zoran Dimov . Odothe sine emembroa taro Romano Konsilo an i Britania i Kendi Šeridan so notiringja kaj akva si šansa te šubnel pe o romano politikano krlo.
Maškar o misafiruia an i akaja konferencia o Dimov ko plo lafikeriba notiringja:
"Amen sar seriozno internacionalno organizacia si amen obligacia te kera realizacia e notirime planenge so si targeti e IRU-ske ko periodo so avela.
Jekh taro majimportantno resarina taro IRU ko periodo so avel si i Demokrtasko tranzicia.
O sasto fokusi tari realizacia taro formiripa e Komisiake vaš i Demokrtasko Tranzicia kote an o čekat si o rajo Gratan Pukson respektirime thaj pendžardo romano aktivisto membro an o IRU thaj ko jekh o jekhto Generalno skeretaro ko Jekhto Romano Kongreso an o London ko 1971 berš. Ko sig vakti ka ovel tumen thaj o raporto tari Demokratsko tranzicia. Ko jekh ka kerel pe sublimato sar šaj te kerel pe elektronsko votipa, kote ko majdemokrtasko forma ka del pe vota bašo avutne membrora an o IRU.
Trubul te vakerav nekobor importantno elementia kote so o IRU ka kerel fokuso ko periodo so avel, a dodova si:
a)E Demokrtasko Tranziciaja ka resel pe majbuvleste thaj majlegitimno mandato e avutne membrorenge thaj funkcienge an o IRU.
b) O IRU ka kerel zori bašo majbaro nivelo thaj numero taro Romane reprezentora ano institucie taro Govermentoa thaj ofisia sar an o lokalno agjaar da ko nacionalno, europakoro thaj lumiakoro nivelo.
Majphravde bičhavav mesažo dži ko sa o institucie sar so si govermenteskere thaj NGO kote o IRU putrel pire udara baši konekcia, korespodencia so ka kerel te ovel majšukar e Romane populaciake, thaj sa e manušenge.
Ko jekh akava mesažo si thaj sako individuake, so isi la kapaciteto thaj kredibiliteto te keren majlačhe bukja sar e Romenge, thaj e Romane jekhinake.
Sako barabutni kerdi akcia si panda majbari kana ka ovel kerdi sar timi, soske o IRU si sa e Romenge tari sasti lumia.
Pakjava kote ka avel o momento kana i Romani jekhin ka ovel organizirimi ko odova nivelo te na ovel targetirimi salde sar "socialno problemo" numa ka ovel partnero ko aniba zorale politikane thaj civilnikane decizie." vakergja o Dimov
Ki konferencia plo lafi keriba sine thaj e Ivan Ivanov, Direktoro an o ERIO, George Dasis . Presidento an o EESC, Dora Husz tari Europakiri Komisia, Livia Jaroka ex depitato an o EP thaj but aver.
