Lungo thaj but lungo ki mapa taro romano aktivizmi , notirime si kaj beršencar em deceniencar sa jekh face si ko stejdži e romane aktivizmoske ko internacionalno nivelo. Odoja „grupa“ taro jekh manuša lačhe „nafatiringje pe“ ko vakti em na mangena te mukhen o piedestalo averenge.
Ola e lovencar so si lenge dende taro donoria em fondacie baši implementacia e bare numero proektia ko anav e Romenge, ola odolea khergje peske „lačho than“ eguzistenciake em prekal proektia buvljarena piro netvorko bukvalno mukhena metastaze ko baro nivelo.
Odva sikavel kaj odola agjaar anavkerde Romane aktivistoa em cicačia e „lovenge taro Roma“ kergje piro „Bastioni“ paše em personalno paravan fondia em telalorganizacie e lovencar taro fondacie so kanalizirinena palem ki olenfe ko odola „aver“ organizacie em buvljaren piri imperia panda buteder!
Ola kergje asavki strategia si ko sa o segmentoa isi olen. Em ki edukacia, sastipe, kherutnipa, butim kultura, sport em aver. Bukvalno o pipke mukhle ko sa o riga em keren aklimatizacia em kreacia ko nacionalno em internacionalno politike e Romenge.
Ko bukvalno segmenti ola si – SAKOTE!
Del pe pučiba si li o internacionalno donatoria em fondacie notacia kaj ola odola love dena sa jekhe isto manušenge?
Ko than odola love te oven dende ko buteder frontoa aso o prioritetia em relevantno romane subjektonge odola love džana sako drom ki jekh Romano NGO Dinastiaso palo odova oj hulavel o love prekal lakere mangina , lakere kriteriumia em sar so olenge valjani. Ama o love palem džana ko olengere „phenjengere“ organizacie.
I EU em o aver fondacie pučleli pe soske si o aver romane organizacie em struktuire sar so si i ERTF so si kotor taro Konsilo Europakoro, soske si o IRU so si kotor taro Unime Nacie em ERTF, soske si o IREM o ERIO, o Phenjalipe, o NRC o Romane nacionalno politikane partoe taro tehma kotar avena em but aver subjektia - Romane.
Soske na rodel pe ekspertiza em olengiri gind taro akala organizacie? O EU em o fondacie si ki gind kaj akala organizacie nane len kapaciteti , profilo em ekspertoa em analitičaria?
Jali odova „Romano NGO Bastioni“ na mangel ni jekh avera romane organizacie te ikljon ko dikhiba. Hulavipaja o love maškar peste ola agjaar ačhona sar „importantno faktori“ ko jakha tari EU em fondacie. Ama bašo sa isi agor. Jekh dibve kana ka „phajrol“ o dudum ka ikljon ko dikhibe sa o fekalie so kerena sine . A sar džana o bukja odova vakti avela but sigate.
Paše si o vakti taro jek– „Goodbye„ odole korkoro notirime Romani NGO Dinastia.
Epa vakti si!
