Ki diz Smederevo taro budžeto e dizjake ka hulaven pe slove te den stipendie 10 siklenge ko maškarutne škole taro romano entiteti. O konkursi bašo stipendie si hramosardo. Tari administracia e dizjake havljaren kaj an o konkursi aven jeria so anen pumare čhaven thaj hovavne sokavena pe kaj si Roma te šaj len i stipendia.
Fundavno šarti trujal so o siklo ka lel 5.000 denaria ko masek sar stipendia trubul te deklaririnel pe thaj te ovel Rom, kote sebepi so si tikneberšengere odoja deklaracia trubul te del jekh taro jeria. Sebepi so isi but "hovavne" Roma, i administracia vakerel kaj odova si baro problemi thaj odothe si phanle vastencar.
I Đulieta Sulič, učo referenti vaš kordinacia e Romane populaciake, notirinel kaj sa o preperutne taro marginalizirime grupe isi len čhani te sikaven piro preperutnipa numa salde o Roma našti. Te manglja neko te kerel odova falsifikato, amende nane čhani odova nesra te čhinava. Kana daja sertifikato, me našti nikaske vakerav kaj ov nane Rom, kaj tu sian Srbianco, Albanco.
Oj notirinel kaj prekal Ustavi sako idividua si la niami te deklaririnel pe sar kamel, numa ko asavko čhani čhinavel o niami e čačutne Romane čhavenge te len i stipendia.
Prekal o lafia tari Sulič ko periodi 2005 dži ko 2015 berš prekal afirmativno konsekvence ko fakulteti hramosargje pe 1000 Romane studentia. Numa o raporto na sine agjaar sebepi so ko realiteti sikavgja pe kaj 70 % taro studentia palo odova sikavgja pe kaj nane Romane.
