Palo agorkeriba i avgo rota presidenteskere alusariba an i them , thaj aso i percepcia taro šerutne an o SDSM kaj havgje o mesažoa taro nacia , thaj notiringje kaj ka ovel užariba an o institucie thaj o koaliciono partenroa palo agor e dujto rotake taro presidenteskoro alusariba.
Aso o aktia sar so džana satrtujnen o info ko šaj te ovel astardo taro odola aktia ko ka ovel an i lista maškar o Roma so pendžaren i situacia ka oven li astarde desave romane anava.
Trujal te sine pendžarde kaj o koaliciono romane partneroa taro SDSM sine skromno an o pire rodaripa an i participacia ko uče pozicie , thaj nane len nisave bare institucionalno anava thaj funkcie (direktoria an o institucie thaj tehmakere kompanie em aver) jekhutne so ačhola sar opcia kote naoficialno buvljarela pe maškar o manuša kote šaj o jekhutno ministersko than kote si Rom te ovel odova da lendo!
Realno odova da Ministeriumo (Ministero bizo resoro) nane le nesavi bari rolja an o Govermento numa te sine odova da lendo tegani o Roma aso i govermenteskiri hierarhia ka oven jekh baro ZERO. Odova ka sikavel panda majhor indolentnost akale Govermentoske mujal o Romane pučiba.
A čačutne vakerdo o korkoro akana an i odoja pozicia ministeri Rom ka ovel salde kurbani taro Govermento sar mesažo baši majbari disciplina e indolentno romane elektoratoske so apstiniringja ki avgo rota presidenteskere alusariba.
Numa i apstinencia sine realno thaj faktea soske sine dende but lafia- a na sine kerdo khanči dži akana e Romenge.
A akana majhari si došalo o Muzafer Bajram ka ovel došalo. Soske? O manuš realno vakerdo nane došalo, soske ov si but tikno vakti an i odoja pozicia te šaj sikave desave rezultatia thaj performanse.
Numa trubul neko te ovel "sebepi" Thaj te sine sa čače akava tegani trubul te aktivirinel pe o alaramo kote ka hramonel " Kobor si respektirime čače o Rom an i akaja them?
Akava si gogjate thaj odole romane partienge so keren koalicia e legarutnipaja an i them.
