I Srbia em o regioni panda tane telal o presie odolea so ovela e kidnapribaja tari tiknai romani 12 beršengiri čhaj i Monika Karimanović taro trujalipa e Nišeske. Šerutno šubikerdo si o Ninoslav Jovanović tari Malča, mapendžarde sar „O Malčansko berberi“ so ikljilo taro phanlipa ko mart akava berš.
Ofto divesa nane i Monika, o jeria em paše familia panda na našaven i pakjiv kaj šaj te ovel irami khere sasti em vesti ama dikhindo si kaj ko akava rodaripa isi but bilačhe punktia.
O sasto akti sine alarmirime prekal o socialno netvorko FB taro jeria, paše familia em amala. O dizutne hulaven sine akaja informacia . Ko sasto odova „haosi“ majtromale sine e themakere institucie i policia tari Srbia em o aver institucie. Palo štar – pandž divesa taro našavipa počmingja te rodel pe konkretno konektiribaja 200 policajcia em žandaria . Akala divesa odova numero barilo em ko 500, numa soske adžikergja pe odokhare?
Akava pučibe šaj te del pe em bare numero Romane organizacienge em liderenge so „trainen“ sine o sasto vakti sa dži ko momenti kana odova „alarmi“ na dengje o mediumia ki Srbia em regiono.
Bukvalno o jeria em paše familia sine mukhle korkoro peste te roden la ola odola štar- pandž divesa!
Sine em asavke so dena sine komentari kaj i tikni Monika „šaj našlja em prandingja pe“ sosoke e tikne Romane čhajenge majlokhu si odoja opcia.
Akalea kana si lafi bašo Roma, i them srbia si la majbare prioritetoa numa o Roma.
Ki sasti akaja situiacia em o presidento e themake o Aleksandar Vučić alo sar tema lafeskeem vakergja kaj džanela akaleske ama na mangel te vakerel aver informacie.
Si li o jeria tari Monika mukhle korkoro ki peste em na trubul li i them em i institucia te ikeren len ki olengiri bibaht. O mediumia resle te keren rekonstrukcia saste akteske em sa akava ulo akcentirime salde bašo 4 minutia em 43 sekundia!
Odola fatalno minute sine vakti kote jekh pedofili saste ofto divesa te garavel pe em i policia te našti locirinel le em arakhel le sar te kerel pe lafi bašpo disavo specialno askeri em džanel te garavel pe.
Fakti si kaj isi jekh milionia propustia. Fakti si kaj i them Srbia em o Roma olake nane majučo prioriteto.
De devla akava sa te agorkerel jekhe šukaripaja e Monikake em te iranel pe sasti vesti ko ple jeria. E palo odova ka phravel pe i Pandorino kutia em ko kergja nalogično aktiviteto. Majbut ka oven e kriseskere institucie so e monstrume e Ninoslav mukhle le ko masek mart taro phanlipadžando mukhele le bizo kontrola, opservacia em dikhiba em dengje le šansa seksualno te atakujnel e tikne čhajen
Ko ka ovel džovaplime odoleske? Ko aver thema peren ostavke taro presidentoa, ministeria ,a ama phrala akava si Srbia akava si Balkan! Odova ko akala thana našti te ovel!
