25% taro Romane čhave nane but lačhe parvarde, a e dživdipaskoro veko ko Roma ki Europa si potikno bašo deš berša ki paralelea avere auropjanencar, sikavela I studia implementirime maškar 4.500 Roma ki sasti Europa.
– Sako štarto Romano čhavo dživdinel ki familia so nane len fundavutne šartia dživdipaske sar so si sasto hape, tato, jali pukjibe kiria. Buteder olendar em si bokhale. Trujal odova e dživdipaskoro veko ko Roma si 10 berš majtele tari aver populacia, hramosarela i Europikani agencia bašo fundavutne niamia (EAOP) ofisea ki Viena.
–O raporto sikavela o šokantno čačipa so isi ko buteder Roma ki avdisutni Europa, vakerel o direktori taro EAOP , o Majkl O’ Flaherti.
I studia si kerdi upral i funda taro anketiriba so si realizirime ko thavdipa taro decembro 2018 berš dži ko juli 2019 berš ko pobuter taro 4.500 Roma ki Belgia, Francia, Irska, Holandia, Švedia em ki Britania. O čhave but droma arakhen pe taro naamalipa em natolerancia , a pobuter taro 30% taro jeria vakerena kaj olengere čhave sine verbalno maltretirime ko škole sebepi olengoro identiteto.
O aver rodaripa kerdo taro EAOP sikavela kaj paše jekvaš olendar o dizutne ki EU (45 %)na mangena te ovel olen Roma komšie, proporcia so majuči si ki Francia (52 %). Te šaj lačharel pe i situacia o EAOP akharel e themen membria ki EU „te mukhen e Romen em e Travelsen te šaj te dživdinen olengiri forma dživdipaske em te erakhen lenge majbuvleste thana em komoditeto ki odoja realizacia“