Mangav te phenav

FB stausi tari Jovana Janevska: Miro anav si Idriz

O teloanav nane importantno, našundo, našavdo nekote maškar o importantno identiteti em naimportantno taro miro personalno dživdipa. Na pungjum le , em nikana na sikliljum le te hramosarav miro teloanav.
Kaske si importantno o anav so mangel le sine miri daj jali o teloanav , jekhutne so šaj te del man miro dat?

O čhave sar mande si učharin ko edukaciakere institucie, ko sastipaskoro sistemo odothe siem šaj em problemi.  Kos a o aver lila amen siem salde kotor taro jekh gendo, jekh statistika, jekh tikno nasasto kotor anavkerdi sra teleperavdi kategoria. Em akate isi jekh savakteskiri em lungo bisterdo maripa amare inkluziake, amare phanlipaske ko sasoitnipa.

A amen siem akate, anglal tumare jakha, telal tumare pire, ko tumare vasta.


Nikana na sium sine nekaskoro. Na sine man familia sar okola familie so isi len ko bilbordia ko Skopje, okola soj bahtale em so bešena barabutne asando ko barvale sofre. Sar biandiljum me sium pe droma. Doduše o drom da si mancar. Ni jekh na nakhavgja man prekal o drom ikeribaja taro vasta em te vakerel mange te dikhav levo em desno ked nakhav o drom . Ni jekh na vakergja mange soske si o  semafori. Sasikliljum korkoro.

Kaj o lolo si maripa, a o harialo (zeleno) stagniriba.

 

Sa o kvartia si mire. Sa o kušia kote garava man taro siledžie. Sa o phurta kote ko mle džepe garavav o love so dena man tumen, sa o raskrsnice kote so bašavav tumenge khujbaja ki mi daburka zorea so nane man takati tari bokh em I šil.


Ama amen o Roma rovaja em asajbaja. Amari bibaht nane sar so si tumari.

Amari bibaht si salde Amari.

Amari bibaht si zorali, muzikalno. Amari bibaht si arti.

Amari bibaht si salde amari.

Isi man but amala. Majbaro kotor olendar si o džukela, kasaja hulavav o dive em o maro, I rakj em o droma. Nikana na mukhle man, Po desavo drom našaja taro birđima, podesavo drom haja barabutne gevrekia ko parko.


Tumari mangin si dujmijali. Tumari mangin si la duj standardia. Tumen na mangena, tumen hohavena. Vakerena kaj mangena čhaven , den suporto e čhavorikane ambasadake em asociacie em čhavengere niamia, a e romane čhaven gazinena so si tumenge pe droma kana džan ko autobusia.

Na bešen dži amende paše, na astaren o račke kote ikera amen . Rovena ki storia e čhajake kibritencar, a ignoririnena e romane čhajen kaskere šudre vasta astaren tumare kaputia.

Slikinen pe thule manušencar ko ploštadi uravde sar Dedo Mraz , so galinen tumare čhaven, a tumare tepnencar šutirinen me amalen.

 

Jertisarav man amare kerde felerencar so si pobuter averengere nego mire.

Amen o čhave kera feleri neli?

Ama gindinav kaj tumen na pomukhen but amenge e čhavenge.

Kobor droma frdingjen man taro busi so na sine man buseskoro tiketi?

Soske na ikaven taro busi e čhaven so si ko busi pumare diencar , a na pukjinen tiketi?

Kobor droma margjen man soske počojral mangljum te khuvav ko tumaro lokali te bikinav palome em te takjovav hari ki dekemvrisko rakj?

Maren li e čhaven kana organizirine desavo hepening em keren zori te bikinen tumenge hurde lovenge?

Ssoke o čhave ki lumia pašljona te soven ko 10 rakjate , a me bisuto bašavav tumenge em ko duj o saati pali I jekvaš I rakj, te šaj te tromarav mi bokh so na del man te zasovav?


Po desavo drom mangav te džanav so udžaren mandar?

Mangen te ova fantomia?

Mangen li te ova čačutne sar tume?

Dengjen li amen šansa odoleske?

Na siklilen li so si siguriteto, so sit e ovel manušeske tato, sama em mangin?

Trujal dživdipe ki dar so dikhena man em daravena man našti sine te sikljovav but.


Miro anav si Idriz.

Mo ilo si romano. Dava le trujal asajbe.

Ko kokala legarav štembili taro aver džonia.

I jakna nane miri

Ko jakha legarav džanlipa. Tume olate anavkeren sar dromengiri, a me ka vakerav džanlipa te šaj te ačhovav dživdo.

Душата ми е ромска. Ја раздавам низ насмев.
Ko breha si man vilo so džanela, sar tumaro da , so čahvo romano sar so rodela sako sabajle tumendar, odova so ačhilo kotor taro ekleri jali deš denaria.

Miro anav si Idriz.
a miro teloanav si naimportantno

 

Akava si notirime e čhaveske so sine mardo taro trin phureder murša ko centro e Skopjeske.

Lipardo e čhaveske so sine mardo ko busi numero 22 tari jekh phureder džuvli.

Liparde sa oe čhavenge kaskere niamia nane lent e šaj teleperaven olen.

 

Link: https://www.facebook.com/notes/%D1%98%D0%BE%D0%B2%D0%B0%D0%BD%D0%B0-%D1%98%D0%B0%D0%BD%D0%B5%D0%B2%D1%81%D0%BA%D0%B0/%D0%B8%D0%BC%D0%B5%D1%82%D0%BE-%D0%BC%D0%B8-%D0%B5-%D0%B8%D0%B4%D1%80%D0%B8%D0%B7/3169039629792009/

 

RDS: Hazri siem te promovirina Rom kandidatia deputateske ki sako Alusaribaskiri jekhin!

I euforia:“Parlamentarno alusariba 2020“ ki amari them na nakhavela ne e romane politikane bloko. Matematikane kalkulaciaja na nakhena ni e romane politikane lideren, a ni okolen sar neve romane politikane protagonistoa.

 

Ko jekh akate si em okola anavkerde „ Romano NGO sektoro“ so dži „erati“ sine sar NGO a akana „metastazirinen pe“ sar politikano profilo.

 

Sar jekhutne akale saste situaciake o Romano demokratikano Sojuzi – RDS  so dži akana figuririnel sine sar nacionalno aktiviteto, hor gindinela te kerel politikano angažmano.

 

Pendžaribaja i struktura em o kapaciteto , o dži akanutne džanle romane politikane „lideria“ a ko jekh em o potencialno kandidatia so mangen te khuven ko „panja e politikake“ o RDS akanaske kerel strategia em plano sar šaj ola da oven kotor  taro akala Parlamentarno alusariba so ka ovel ko 12 aprilo akava berš.

 

O RDS akcentirinela kaj šukare pendžarel i struktura em o problemia , a ko jekh em faisalia o problemia ki romani jekhin ki them em lokheste ka prependžarel o čačutne nietia taro aktiviteto taro RDS,

 

Odoleske si hazri te den ki pli lista ko sa alusaribaskere jekhina ki them , a premal o amplitude đaj lokheste te ikaven Romane deputatia taro RDS ko avutno makedonikano Parlamento.

 

Jekh džanel pe kaj panda na sikavge odolea kasaja ka džan em savi politikani opcia ka ikeren e makedonsko blokoa, kasaja šaj ka keren eventualno koalicia.

 

Sar so vakeren taro RDS ola si sreizno hazri akale akteske soske džanen pire kapacitetia em o profilo so šaj dena ko parlamentarno alusariba.

Sr so vakeren but sigate ka džanen so ka keren majodoriga em so ka kerel o RDS  so čačipaske but siga avela akava peroiodi.

O Mahatma Gandi vakergja akava panda ko 20 veko: Akala si 7 bukja so ka zijankerel amen!

O Mahatma Gandi gejnela pe maškar okola majfascinantno persone ko 20 veko. Oleskiri tromali percepcia mujal i diskriminacia ko South Afrika em India, barabutne sikljojbaja kotar so iklili akaja percepcia, em kergje le jekh taro majbare em majimportantno egzamplo e manušipaske.

 

Ko majkale aktia ki historia taro deiba Nobelovo phursako , preperel em o fakti kaj o Komiteto na angja decizia o phursako ma te del pe e Gandiske. Ov mulo ko 30 januari 1948 berš.

 

Drabaren kola 7 bukja hulavgja len sar majrisiko e manušipaske:

 

  1. Barvalipa bizi buti;
    2. Čalipa bizo gogjaveripa;
    3. Džanlipa bizo karakteri;
  2. Relgia bizi viktimizacia;
    5. Politika bizo principia;
    6. Džanlipa bizo manušipa;
    7. Buti bizi etika.

RDS: O alusariba si paše, o kalkulatori ko vast!

Džale si kaj o 12 april si berš kana I tehm ka ovel than kote pire takatia ka merinen o politikane faktoria an I them. Te sine sa ok bašo nekobor divesa (11 fevruari) trubul o parlamenti te del ostavka jali 60 divesa angleder te ikeren pe o parlamentarno alusariba.

 

Em o bare em o tikne partie sako pire matematikaja em visiaja ka ovel olen šajdipate prezentirinen pe sar „importantno politikano faktori“ te šaj resel pe so majbaro kotor taro kolači e avutne legaripaske.

 

So bi vakerel o Goce Delčev kaj ov havel i lumia sar umal taro kulturno meči e naciengoro, ko akava momenti šaj odova formulirinel pe sar aver konotacia em formulacia: „Me havava i lumia sar umal taro meči maškar o partie em o nacie“!

 

E akana kaj si akate o romano politikano bloko? Taro sa o riga počmingje pire kalkulaciencar, taktike em pozicie. Odola da so si e SDSM-ea em okola so si e opcijaja VMRO-DPMNE, em okola so ka džan sar solo.

 

Sa si optimistia. Jekh si evidentno. O SDSM so ki peste isi len romane membroa ola si evidentno kaj ki lista deputatenge akcentirinen pe nekobro anava, a anghlal ikljona o anava sar so si Asan Ferat, presidento e komunakere ofiseske taro SDSM, o akanutno komunakoro presenteri i Fata Osmanovska, em o anav tari Ljatifa Šikovska taro romano NGO sektoro.

Ko jekh phravdo than si e romane deputatenge taro romano politikano bloko SRM Amdi bajram em taro PCER o Samka Ibraimovski.

 

Taro VMRO-DPMNE fakti si kaj e romane politikane bloko nane le desave deputatengere aspiracie ko Parlamenti , numa te legargje i viktoria oleneger apetitia si derektorsko pozicie . Asavke aspiracie isi e membro taro VMRO-DPMNE taro Šuto orizari o Erdžan Demir, taro DSR o Šaban Saliu, taro ROM o Erdžan Selim thaj avera.

 

Interesno si so isi asavke da so ko akala alusariba šaj te džan biathinale em olendar te resle desavo deputatengoro mandati te keren pazari okolencar ko ka legarel i viktoria. Asavke anava si sar o Aksel Ahmedovski o ex ministeri bizo resoro so isi le akana nevi partia, ko jekh akate si o Gege Demirovski  enm oleskiri grupa so den le suporto, a ko jekh šaj te ikljon panda desave anava so si taro romano NGO sektori. Ko jekh „phanle vastencar nane te bešel ni i romani diaspora, kote jekh taro odola anava akanaske si o Demo Ismail tari Belgia.

 

Sa na sa udžarel pe interesno periodi ko akava šaj te vakera tato anglonilaj , em ka ovel than panda bute „manevrenge“ taro jekh ko aver than. So ka anel o periodi ka sikavel o vakti. Ka resen li o Roma te nakhaven akava politikano lavirinti ka dikha!

FaLang translation system by Faboba

Mangava te vakerav

Momentalno Online

       Isi 102 misafirija so dikhena o ROMATIMES.NEWS

Golden Wheel - Entry Application Form

o Vakti

 booked.net

Majpopularno

Flag Counter

Amaro brojači genjela taro 13.01.2019
Gejnela isto manuša tari koja phuv drabarena amaro portali
Majtele isi sa-ko-sa kozom dikhle o portali