O rodaripa taro o kotora so ačhile taro danda taro nacistikano diktatoro peravgje sa o dileme kaj o Hitler čače mulo an o 1945 berš.

O Adolf Hitler sine le but bilačhe danda. Odova fakti sine pendžardo dži akana, numa okova so si nevo kaj si arakhlo validno fakti bašo korkoromudaripa e Hitlereske an o 30 aprilo 1945 berš . Timi taro francusko patologia, akana sig resle decizia te keren rodaripa taro nekobor danda taro hitler so beršencar sine arakhle an i Moskva, a sine arakhle an o Berlin ko starti taro maj 1945 berš . Akava si avgo drom rusiakere legaripa te mukhen nekske te rodel akala elementia. I konkluzia taro o ekspertia so sine sikavde persi kurko si klar decidno.

„O danda si autentično - nane nisavi dilema", vakergja o patologo Filip Šarlie e agenciake AFP. "Amare analize sikavgje kaj o Hitler čače mulo an o 1945 berš".

I Elena 47 beršengiri socialno bukjarni sine sterilizirime kontra olakoro mangipa. Oj si jekh taro 4 Romane džuvlja tari Čehia so si viktimi tari namangipaskiri sterilizacia thaj notirinel piri storia an o teatarsko performanso anavkerdo sar " Storie si nikana na startujngje"

I sistemsko sterilizacia e Romane džuvlenge bizo olengoro džanlipa sine themakiri politika tari Ex Čehoslovakia ko vakti taro komunizmo . Sine čhinavdi an o 1993 berš aso Europakoro centro bašo niamia e Romengem numa odoja politika geli majodorig thaj an o 90-to berša sa dži ko 2000 berš , a o agorutno pendžardo egzamplo kergja pe an o 2007 berš.

Buteder taro 10 berša i Elena si aktivno asn i grupa Romane džuvlja so notirinen akava problemo thaj plasirinen le sar politkano plano. Ola sukcesiale keren maripa mujal zorti sterilizacia an i Čehia. Roden finansiko kompenzacia okoleske so kergje. Numa ola notirinena kaj na kerel pe buti salde e lovenge numa te oficijalizirinel pe i doš so kergje upral o Romane džuvlja.