Romani Demokratikani Unia – RDS: Jekh alusaribaskiri jekhin – baro teatro
O koncezusi maškar o partie baši jekh alusaribaskiri jekhin akanaske nane. Lokhe si jekh partia te del suportho akaja inicijativa , kana džanel pe kaj o avera na mangen te ovel odova. Em akate počminel o baro performanso.
Te paj trampinel pe o modeli taro šov ki jekh alusaribaskiri jekhin , valjani duj šartia: majanglal koncezusi taro politikane partie thaj dujto primal internacionalno standardia alusaribaske em propozalia taro OSCE / ODIHIR odola trampe valjani te agorkeren jekh berš anglal o alusariba.
Sebepi so o bare partie majbut našavena jekhe alusaribaskere jekhinaja , trujal I verbalno deiba pativ , ola čače nane zainteresirime te našaven o “monopoli” upral o hangia so sine dži akanutne ko hulaviba e hangoroe so si leneg sar garancia.
Kana siem ko Roma , jekh alusaribaskiri jekhin si opcia so si lačhi , ama ki savi forma? Oj si lačhi salde te siam sine sar ki jekh kupa.
Ama pendžaribaja amaro mentaliteo ko Romano politikano faktori, ola ki odoja Politikani filharmonia sako mangel te ovel dirigenti an niko na mangel te ovel – muzičari.
O Amdia taro SRM, o Samka taro PCER, o Šabani taro DSR, o Neždeti taro OPER, Berati PIR, Erdjan ROM, o Akseli oleskere neve partiaja, a ko jekh thaj o Krta Duduš, Erdjan Demir, Asan Ferat , o Gege, em avera ka ovel but phareste (drabar . našajdutni misia) te keren unipa pire interesenge ko anav sa e Romenge.
Te sine pendžarde em o aspiracie e neve politikane asociajciake i AVAJA em olengere nagarvde politikane aspiracie , a te na ignoririnen pe em o aspiracie tari nevi asociaci Romano Demokratikano Sojuzi – RDS, tegani ka ikljol kaj panda pophareste ka resel pe dži ki resarin , so buteder Roma ko Parlamento.
Phareste si kaj o „purane politikane face“ ka mukhen em ka keren than e „neve romane liderenge“ . I fotelja si gudli soske anel bu baro individualno benefiti.
Te kergja pe akava modeli tegani ka ovel šansa te ova svedokia taro jekh Teatro anavkerdo sar „ Muja bizo maske“ . Ka ovel interesno, urnebesno em jekh siguritetno - sako ka manegl o pani te anel le ki „pli vodenica“.
O šanse odoleske si realno 99.99%. O aver resto 0,01% ka ovel odova “Mission Impossible”
