I fundavno em maškarutni edukacia ki Makedonia si obavezno taro 2008 berš numa o numero taro čhave , anglal sa Romane so na džana ki škola sikavel kaj akava Kanoni tari edukacia na implementirinel pe.

Bibahtake nane oficialno statistika taro Ministeriumi edukaciake kobor si čače o numero taro čhave so na džana ki škola em sako dive o numero si dinamično em iranel pe.

Trubul te vakerel pe kaj o familie resen em diferentno lovengoro suporto sakone čhaveske sar stimulacia em motivacia  te šaj te džan o čhave ki edukacia bilo fundavutni jali maškarutni. Numa palem taro 5 – 10% taro Romane čhave si avrial taro edukaciakoro procesi.

Trubul sistemsko faisalia tari inkluzia e romane čhavengoro tari edukacia . Džanel pe kaj nane čhavo so na mangel te džal ki škola , em si li odole čhaven jekh a jekh startno pozicia ki škola sar so si e čhaven so nane Roma.

Trubul te džanel pe o socio ekonomsko status e Romengoro so beršencar napalal dživdinen kko čorolipa em bibukjarnipa so direkt kerel presia suporto ki edukacia em inkluzia taro edukaciakoro procesi.

Ko romane mahale ki Makedonia si potencialno vakteskiri bomba ko masovno buvljaripa taro virus “Covid 19” . Odova nane sebepi etnikano preperutnipa taro Roma, religia, kultura jail aver, numa sebepi o šartia em than dživdipaskoro I bilačhi ekonomsko situacia so si limitirime ekonomsko opcia em prevencua em sastipaskiri protektiva.

O ekonomsko takati taro pobuter Roma ki Makedonia si but kišlo so avel o pučiba te šaj saste te nakhaven I ekonomsko kriza . Trujal sa em o šartia dživdipaske ko mahale keren panda majrisiko I situacia te šaj te buvljael pe o virusi, em nanipa taro sastipaskoro siguriteti so kerel panda phareste e sastipaskiri protektiva.

Pobuter Roma keren neformalno ekonomia so akana nafunkcionirinela , a o zalihe lovencar em artiklia čače si minimalno.

Ko majsiga vakti dopherdo problem si o tikno džanlipa e rizikoske taro akava virusi. But manuša ko romane mahale keren sar te nane virusi. Kana I policia iranel o redo em phanlja e dizutnen kop le kherasar ko Skopje em ki Makedonia prekal I rakj ulo jasno kaj buteder Roma si len kišlo ekonomsko takati em našti te dživdinen ni jekh kurko ko asavke situacue soske na kerena buti so si konektirime e naformalno ekonomijaja.

Čače sako so džanel majhari bašo save šartia isi dživdipaske ko Roma ki Makedonia ka vakeren kaj ola si čače majteperavdi kategoria manuša em trubul suporto em arka.

Lokhe si notirinel pe masovno infekcia ko mahale so si uoreder 10.000 dizutne. Panda majbilačheste si so I bokh, socialno nasiguruteto em nanipa hajbe , so nane ki Makedonia panda taro dujto lumiakoro mariba.