Pali havljarin taro sa makedonikane mediumia kaj policajcia sine atkujme ki Šutka , thaj legarde an o hospitalo, reakcia kergje o Roma tari Šutka . Aso olende kerel pe lafi bašo kidnaperia, so sine an o vordon bizo tablice bizo palune sedištia, a olencar legaren sine fantomke em lopata. Odova sine o komentaria taro dizutne so sine odothe thaj o komentaria an o FB thaj slike taro vordon (džip marka Suzuki bizo tablice) so sine odothe ačhavdo thaj sine slikime andre ko vordon.

Numa kontra akava o makedonsko mediumia informiringje kaj "Čačutni drama sine an i Šutka kote o Roma margje policajcon so na sine ki buti, kaske mislingje kaj si kidnaperia"
Ko jekh em o MVR isi le javer vakeriba:
- Paše ko 17:20 o časo an o drom Indira Gandi ko Šuto Orizari tikni čhaj vakergja kaj napendžarde manuša zorea lele džuvlja ko kombe, ama nadžanel koja i džuvli. Oj odova vakergja jekhe Romeske so notiringja an i policia. Khedingje pe bari grupa Roma kote ko odova momenti avilo vordon trin personencar, kote duj sine policajcia ko PS Butel so ko momenti na sine ki buti - vakeren tari policia
Ola dopheren kaj odoja drupa atakujngja e personen so sine an o vordon thaj si legarde an o hospitalo, O trin džene si taro gav Dolno Blace.

Akala dive an o socialno netvroko FB sine pherdo informacie thaj komentaria kaj napendžarde persone vordonencar thaj bizo registarsko tablice palden trujal o Skopje thaj an i Šutka thaj kergje nekobor droma mangin te kidnapirinen - čoren nesave čhaven. Sebepi akava fakti , i Roma tari Šutka thaj o trujalipa si an i panika thaj organiziringje thaj grupe ko droma te šaj astaren odolen navodno čora -kidnaperia e čhavengere. O Roma tari dar thaj panika, e čhaven da daran te mukhen ko škole te džan.

Odoleske i redakcia taro web portalo Roma Times akhargja e MVR thaj an o telefonsko lafikeriba e Portparolea taro MVR o Toni Angelovski so sine pučlo bašo akava momenti o Angelovski notiringja: " Akava si saste hohavni informacia so buvljarel pe an o socialno netvorko FB thaj maškar o manuša amen sar Ministeriumo bašo andrune bukja iklilem demantoja akale informacijaja. Majangla akaja informacia sine hulavdi an o FB vash desavo čoriba thaj kidnapioriba čhaven taro duj persone thaj sikavde si olengere fotografie , a odola fotografie si tari desave manuša taro Mexico thaj akaja informacia so hohavni. Ko jekh kamav te akcentirinav kote ni jekh persona - dženo ni notiringja thaj avilo an i Policia te notirinel kaj neko manglja jali kergja mangin te kidnapirinel čhaven bizi diferenca ai li ola aver thanendar jali taro Šuto Orizari, Skopje jali Makedonia, " akcentirinela o Portparolo taro MVR o Angelovski.

A ko jekh akaja informacia maškar o Roma tari Šutka reslja asavko baripa thaj panika kana o protalo Romapress havljargja informacia kaj isi desave persone so keren kidnapiriba an i akaja komuna , thaj sine havljardo jekh video materialo sar pučen desave Romnja taro Šuto Orizari kote vakerel piri na oficialno versia akale momenteske.

Odoleske i redakcia taro Roma Times aso sa o profesionalno žurnalistikane parametria majanglal rodingja informacia taro MVR thaj sa akala špekulacie sine demantirime , thaj ko jekh o MVR bičhavel apel te da sar Roma Times informacia dži ko sa o manuša thaj o Roma taro Šuto orizari ma te pakjan ko asavke naprovereno thaj hohavne informacie thaj manipulacie.