O Ginekologo tari Šutka hohavgja sine bašo plo bukjarno džanlipa
I American Hospital tari Tirana, Albania kergja reakcia dži ko makedonikane mediumia so dengje i informacia kaj i d-r Vjolca Mbiara kotor taro plo bukjarno aktiviteto sine la an o odova hospitalo.
A so American Hospital i d-r Mbiara nikana na kerel sine buti an o akava amerikakoro hospitalo an i Tirana thaj notirinena kaj seriozno peravena o respekto olengere kompaniake an o regiono.
Pali akaja reakcia tari Amerikansko hospitalo an i Tirana anel pe dži ko pučiba ko čače kerel buti an i poliklinika ko Šuto Orizari sar ginekologo , soske olakoro agjaar notirimo "bukjarno džanlipa" sine akcentirime sar jekh taro ošerutne adutia so sine prezentirime kana startujngja bukjaja an o Šuto Orizari kote na sine ginekologo lungo vakti.
„Avava tari Albania kote so agorkergjum o studie an o Medicinakoro fakulteto an i Tirana, startea taro 2000 berš, thaj agorkergjum an o 2006 berš. Kana agorkergjum e medicinakere studie sine man duj beršengiri praktika an i themakiri klinika an i Tirana thaj odova an o periodo taro duj berša ( 2006.-2008. berš).