O kurko sdo nakhlja an i politikani romani scena sine interesno!. Angleder havljardi inicijativa baši smena e teganutne Ministere bizo resor thaj šefo an i implementacia e Romane strategiake o Aksel Ahmedovski realiziringja pe akala divesa kana o premieri Zoran Zaev tari parlmentarno bešin akcentiringja kaj akaja trampa si politikano akti thaj odova rodingja olengoro koaliciano partenri o PCER te trampinel pe o o Aksel Ahmedovski thaj nevo ministeri si notirime o membri taro PCER o Muzafer Bajram.
Palo odova o premiero Zaev naoficialno prokomentiringja kote i tramapa taro Ahmedovski ka ovel leske arakhlo nevo angažmano bukjake ko desave instituciakere ofisia. Ko jekh o Aksel Ahmedovski prekal piro FB profili hramosargja kaj dela ostavak taro PCER em i funkcia - vicepresidento an o PCER.
Angleder i smena sine bare reakcie thaj komentaroa taro duj kontra grupe taro lobi an o PCER thaj odova okola tari Pačim -zapad thaj i Purab - istok an i them. Liferujnena sine anava potencialno kandidatia bašo ministria , numa sa odova agorkergja sar so agorkjergja. Aso sasti gind akale smenaja notirinena kaj majbut našavgje o korkoro Samka Ibraimovski thaj oleskoro majpaše "privezoko" o Hasan Idrizi soske ola duj džene majbut "keren sine akaja šema" i smena taro Aksel Ahmedovski thaj korkoro kreirinena sine o anava akale funkciake.
Numa akana ikljola ko horizonti nevo momenti. Si li neko an o taboria taro džieratutne membria taro PCER barile o apetitia thaj politikane ambicie, počmingje te implementirinen idea thaj inicjativa an o formiriba piri politikani partia orefiksea -Romani. Odova majbut ikljola taro okola manuša so sine len bare afinitetia thaj apetitia uče funkcienge an i them telal o plašti PCER , numa olengoro lobi propelo.
Em akana kana si saste phanli akaja situacia akala taro utar thaj purab Makedonia (Kumanovsko, Berovsko, Delečevsko, Kočansko lobi) ekipirinena pe te keren piro politikano bloko , thaj te dengja pe šansa te keren aktiviteto.
Numa kobor ka ovel efektno akava bloko si pučiba soske trujal o prefikso "romano" majbaro kotor olendar na džanan i romani čhib numa sine aktia kana anglutne deklaririnen pe sine sar Khoraja -Turklie thaj aver , numa kana iklolja sine intereso (drabar romane proektia, strategie, akcie thaj aver) ola urgentno keren pe sine Roma. Kobro ka ovel o efekti taro akala megamix partie an o anav e Romenge si baro pučiba.
Numa anglalnotacia si o baro personalno interesi akale chidime naciake.
Asavki situacia si thaj an o Paščim thaj utarpaščimalo kotor e themake . Akava si tipično ko okola lobi grupe taro Tetovo, Gostivar, Debar, Kičevo, Ohrid, Resen, Bitola thaj Prilep. I situacia si identično thaj ko jekh o faktori tari dinetifikacia so deklaririnen pe sar Roma.
Akade da si o megamix taro interes aso o Roma kana trubul , ola da nadžanen te komunicirinen pi romani čhib, thaj keren lafi albanikani, turkiakiri, makedonikani čhib, a deklaririnen pe sar Albancia, Turklie em sar Egipkjania.
An o interes te resen "funkcie thaj profiti" ola si hazri ko sa, salde na te keren ko interes e Romenge thaj e romane naciake.
Ko tikno siže olengere personalno profiteske giljave okoja proleteriatsko gili : " Budi se istok i zapad, budi se sever i jug".
Ola džangavgjovena te šaj e Romen majodorig te na ovel len lačho suno thaj te ovel olen košmaria an o sune.
