Savorenge si pendžardo o momento tari persi berš kana iklilo okova kaj e švediakiri policia kerel garavdo registari anavencar taro milja Roma an i Švedia. O švedsko govermento ikavel pe sine lafencar kaj si odova maripa mujal o kriminalo.
Kana dikhlja pe odova registari sine bare reakcie. Ko jekh o Romano NGO sektoro reagiringja. Ko jekh thaj o mediumia da kergje bari reakcia.
Prekal teganutne informacie akava registar si kerdo panda 2005 berš, thaj od tegani sistematsko kerel pe sine dopheriba thaj ažuririba. Ko odova registari kerel pe opservacia thaj upral o Roma so si lungo vakti (upreder 150 berša), an i Švedia, a savoren notirinen sar kriminalcia. E švediakiri ministerka baši EU i Birgita Olson, anavkergja akaja baza taro informacie sar "daravutni, naetičko thaj mujalkanonikani". Akale skandaleske na traingje ni o mediumia. Ki Germansko gazeta "Frankfurter rundšau" hramosargje: Ladžavipa, sakandalo, rasistikano maltretiripa". I gazeta "Tageszajtung hramosarel kaj akava registri si but bilačhe refleksiaja. Sar egzamplo del kaj i tikni Sara Hakanson si la salde duj berš, a lakoro anav arakhel pe ko piliciakoro registro. Oj odothe registrimi si salde kana sine la 3 masekoja. Olakiri phen i Miranda kaste si la 3 berš thaj olakere daja i Sandra si hramosardi ko odova regsitari. Ko registar isi 4.000 anava, thaj sa odola si Roma. Premal o Švediakere NGO organizacie, akava si sar ko 1942 - 1943 ko vakti tari nacistikani Germania kana keren pe sine registracie e Romencar thaj o Jaudie. Akava ko jekh liparel i diskriminacia mujal o Roma an i Švedia maškar 1914 dži ko 1954 berš kana sine namukhlo o Roma an i Švedia te dromaren , tromalutne. I Majbari ironia si kana e Švediakere legarutnen pučen bašo Anticiganizmi, ola phenen: "Asavko an i Švedia nane!"
