Ki diz Kosovo Pole akala divesa agorkergja o 4-to ko niče " Romano Festivali Kulturake". Premal o lafia taro organizatori Gaši Ridvan akava da festivali sar o anglutne trin droma, ikergja pe minimalno lovencar.
Premal oleskere lafia i organiyacia akale kulturne manifestaciake taro berš ko berš si sa pophare soske nane nisavi materialno jali lovengiri arka jali donacia te šaj ikerel pe kontinuiteti e festivaleske.
Akava festivali si but importantno e romane populaciake an o Kosovo. Spremal o lafia taro Gaši o institucie an o Kosov na vazden pi sama upral asavke manifestacie kana kerel pe lafi e Romenge.
Ov vakerel kaj trujal so ko olengoro pašipa isi 6.000 Roma salde 5 džene legaren o sasto pharipa akale manifestaciake.
" Akava da berš rodingjem arak taro Ministeriumi kulturake taro Kosovo, numa ola ačhile kašuke ko amare rodipa" - potencirinel o Gaši.
O festivali majbut sikavela filmsko produkcia , kote majbaro targeti si i romani populacia thaj i romani tematika. Amen o Roma taro Kosovo siem ko margine. Na den bari arka thaj ko akava festivali valjani sine te vaen pobut dđene, misafiria, numa sebepi o love pherdo olendar na ale. Amen ka dža poodorig numa dđi keda ka šaj agjaar te kera buti biyi arka odova nadžanel pe, notiringja o organizatori Ridvan Gaši
