Jekh taro medalje ko jugoslovensko boksi ko Olimpisko khelina reslja em o Redžep Redžepovski , romano bokseri tari Makedonia so sine ko 1984 berpš ko Los Andželes em irangja pe tar Kalifornia e rupune (srebreno) medaljaja.
Ki kategoria muva dži ko 51 kg o jugoslovensko reprezentativco našavgja o finel taro amerikansko bokseri Stiv MekGregor 4:1.
Dži ki medalja ov margja ko štar mečia kote jekh tehničko nokautea ki dujto runda.
Palo o finale reslja leske ponuda te bikinel i medalja bašo 10.000 dolaria ama ov na manglja. Jekh dive palo odova o Amerikancia vakergje e Redžepeske kaj ka den le 50.000 dolara te ačhol ki USA em te ovel profesionalno bokseri. Ama akava da drom ov na manglja.
O rupuno olimpijci taro Los Andželes palo odova ulo socialno slučaj a jekh makedonsko gazeta hramosargja: O čorolipa nokautiringja e Redžepovski”
Em vakerel kobor si phareste te dživdinel pe ko Kumanovo pe romnjaja em štar have.
Angleder nekobor berša ko šokantno intervju e makedomsko mediumenge vakergja kaj nane le love te kinel kifla pe čhienge ki škola .
„Na dživdinel pe tari havaja. Edvaj siam dživde” vakergja o nekanutno šov domengoro šampioni e Jugoslaviake manuš so ko 420 mečia salde 5 droma sine mardo. “ Nane man khanči tari slava. Nane man ni jekh dive bukjarno staži , nane man love. Nikana na peljum ko ringo, ama akana peljum ko dživdipe em sium bisterdo”
Youtube:
