Politika

Startujnena o hazrkeriba bašo statsitikani operacia - gejniba e dizutnen, panda na džanel pe ka ovel li grafa -etnikano preperutnipa

Dži ko 27 akava masek trubul te arakhel pe i firma so ka kerel o softver , (aplikaciono faisali) e eksperimentalno operacia - gejniba e dizutnen, familie thaj khera an i Makedonia. E themakoro ofiso baši statistika angleder 2 divesa hramosarda akharin , solea oficialno starto ko hazrkeriba bašo statsitikani operacia - gejniba e dizutnen so ka ovel kerdo eksperimentarno so ka ovel an o aprilo thaj o oficialno popis ko april o aver berš.

„Akana rodena pe faisalia baši aplikacia faktea so akaja statistikani operacia ka ovel kerdi prekal transmiterno kompjuteria. O eksperimaentalno popis ka ovel ko 16 dizjka thaj 16 gava, a ko kotor kaj si ikavdi i grafa - etnikano preperutno o agorutni decizia ka ovel notirimi taro Parlamento. Amen vakergjam amaro dikhiba thaj opcia" vakergja o Direktori taro Ofiso baši statistika o Apostol Simovski.

An i tendersko dokumentacia šaj te dikhen pe nesave pučimata so trubul te ikerel i aplikacia. Sar egzamplo, moduli taro informacie e personake, thaj pučiba so trubul te den antvorot o persone so ka oven evidentirime si dajakiri čhib, themutnipa, ka oven pučle kobor vakti dživdinen ki odoja adresa, i persona iranel pe li an i familija buteder taro duj droma ko masek, ekonomikano statusi, savo transporto istemalkerel te resel dži ko piro bukjarno than jali škola, sar dživdinel kotar leske love thaj aver. I grafa etnikano preperutnipa nane ikerdi ki tendersko dokumentacia e softvereske.

Taro themakoro ofiso baši statistika vakergje kaj šajdutne si kana ka ovel o popis te na oven pučle baši etnikano thaj religiakoro preperutnipa, soske sar so vakerena odola informacie nane len nesavo abro praktikano moldipa numa šaj te oven politikane involvacie.
„Dži kana na sine nikana jekh popis a te na ovel politizirime, a majbut politizirinel pe i etnikani komponenta. Odoleske siem hazri te distancirina amen taro desave aspektoa , numa politizacia nane te mukha te ovel. Te notirinav, akava si statistikani operacia. Aso amaro Ustav , o niamia taro desavi grupa dizutne ikljola tari i čhib so keren lafi, a na taro etnikano preperutnipa" vakergja angleder desave masekoa o Simovski.

O agorutno epilog ka trubul te vakerel o Parlamenti aso o nevo kanoni bašo Popis , trujal so zorale isi reakcie ko fakti kaj ka kosel pe i grafa - etnikano nacionaliteto. faktea so an i them nane te ovel la percepcia o procento taro etnikumia so dživdinen an i Makedonia.

I sasti akaja operacia taro popid trubul te ovel 8 ½ milionia eura , so si but pohari taro okola 14 milionia eura taro nasukcesialo kerdo popis an o 2011 berš. O nasukcesialo popis aktueliziringja le thaj o SJO kote trujal i funda taro o snimke taro o bombe phravgja rodaripa bašo Nikola Gruevski thaj Ali Ahmeti telal šubikerin kaj ola teleperavgje o oficialno pozicia thaj kergje zijani an o budžeto bašo 2.8 milionia eura

Agorutno popis an i them sine ikerdo ko 2002 berš thaj i Makedonia si jekh taro raritetno phuvja an i lumia so e manušen na gengje olen pobuter taro 17 berša.

Milionia dizutne tari EU akana šaj te aplicirinen te regulirinen piro statusi an i Britania

O dizutne tari EU ka trubul te aplicirinen te šaj te aplicirinen te šaj ačhona an i Britania numa o organizacie taro o jekhina notirinena kaj o teleperavde grupe taro jekhina šaj te oven čhivde an o risiko.

Trujal so salde 5% taro aplikantia si len akharin te šaj ačhona an i Britania si irame jali čhinavde problemia, paše 175.000 manuša šaj te ačhon bizo piro dži akanutno statusi an i Britania.

Ko krisipa taro govermenteskoro akti , 65 prepeurtne tari i grupa suporto e Romenge so apliciringje te šaj faisalkeren piro statusi istemkeribaja odoja mobilno aplikacia. O rajo Bika bašo Sky News vakerel kaj salde efta džene džanen te istemalkeren odoja aplikacia bizo problemo.

"O manuša čače si sekirime akaleske" vakergja ov " A amaro kapaciteto te šaj da olen suporto si čače limitirime"

"Persi berš kergjem buti 3000 personencar taro paše 200.000 tari sasti Romani jekhin. Amen pakajaja kaj o butiba nadžanena savi si olengoro statusi ko mahalae kote so bešena"

O Govermento insistirinela trubul te sikljon pe o aplikacie taro o Windrush skandali thaj ka den suporto te regulirinen piro statusi istemakeribaja buvlo spektari taro diferentno dokumentacia.

Maškar o konsekvence an i translacia, telefonsko linia e personenge so si len asavke problemia, thaj te arakhen suporto e manušenge ko olengere khera te sine len limitirimo mobiliteto.

E europakere ambasade ko jekh dena suporto pire dizutnenge so keren buti an o ofisia thaj den konsiliarto e manušenge so sekirinen pe olengere statuseske.

Link: https://news.sky.com/story/eu-settled-status-launch-sparks-fears-of-a-new-windrush-11613355

 

O Karakačanov rodela te chiden pe o "Romane getoa" an i Bugaria thaj limiti an o nataliteto ko Roma

,,Našti te ovel duj thema an i jekh phuv sar so si i Bugaria ko 21 veko. Jekh e Romenge , a i aver sa averenge" - vakergja o Krasimir Karakačanov sikavibaja piro koncepto ko faisali e "Romane pučibaske" an i Bugaria.

E bugariakoro vicepremiero thaj ministeri arakhibaske o Krasimir Karakačanov kergja Koncepto ko faisali e problemeske e nasocializirime Romane grupe , hramosarel o bugarsko "Fokus"

,,Jekh them si akaja e manušenge so respektirinen o kanonia, pukjinen o danokia, educirinen pe, rodena buti, a oaver kotor si i Bugaria okola o nasocijalizirime kotora taro o Roma , so kamen te oven len sa o niamia, a te na ovel len nisave savale" vakergja o Karakačanov.

Ov dopherela te implementirinel pe limiti an o socialno love so si jekh taro prioritetia, soske našti neko te lel socialno okoleske so namangel te kerel buti , te del pe leske čhavorikano lovengoro dodatok thaj aver love bizo desave limitiriba thaj šartia.

,,Ko jekh ka trubul te ovel edukacia e Romenge" vakerel o vice -premieri.
,,O Geto (e Romengoro) si sar than kote isi but naeducirime thaj analfabetia, kriminalo, prostitucia, droga, tikni kultura thaj nahigiena. O Geta trubul te eliminirinen pe thaj odothe kote o komune ka arakhen than e romane populaciake te šaj keren pe khera, thaj odova tamikeriba khera te ovel kote o Roma da ka len than ki odoja buti soske ola ka bešen odothe, a na te len sa ko hazri bilovengoro em palo odova te zijankeren le" vakerel o Karakačanov.

Ov ko jekh rodela te implementirinel pe aktivno praktika bukjake, keriba centroa kote akala manuša so na gele an i škola thaj nane olen nisafi profesionalno jali bukjarni praktika te šaj prekal akala programe kote hulaven pe bare love , te džan odori te sikljon te šaj keren buti.

Ov rodel an i time učo nataliteto te implementirinen pe stimulacie te šaj limitirinel pe o nataliteto. Te imlementirinen pe bilovengere aktia , sar so si abortusi so ka pukjinel i them okole džuvlenge so si len duj jali trin čhave , vakerel e bugariakoro vicepremiero. Oleskoro dokumento ka ovel dikhlo an o Konsilo e Ministerengoro.

An i Bugaria isi baro numero Roma. Aso agorutni statistikani operacia gejniba sar Roma sine deklaririme paše 700.000 , numa si indicie kaj si ola 1.000.000.

Majbut olendar dživdinena an o romane mahale -getoa , baro numero bizi buti, bizi edukacia, thaj učo nivelo kriminalo. I Bugaria o problemi uintegracijake e Romenge kamel te faisalkerel le akale neve strategijaja, thaj akaja taro Karakačanov si jekh taro akceptirime.

Čhivdi signatura an o Protokolo te šaj i Makedonia khuvel an o NATO

An o ofiso taro NATO an o Brisel an o 7 fevruari 2019 berš , o ambasadoria taro 20 thema membroa an i NATO aliansa dengje piri signatura an o protokolo vash membripa e Makedoniake an o NATO. Ko periodo so avela trubul oleskiri ratifikacia an o parlamentoa taro sa o thema membria.

„Odova sine phareste drom pherdo kompromisoa. Lungo vakti Udžarasine te aven an i akaja familia. Lelen than an o misie taro NATO thaj kergjen o reforme so trubul bašo te oven 30-to membro an o NATO. Pali oleskiri kerdi signatura akana si o proceso tari ratifikacia thaj džanaja kaj odova ka ovel ratifikujmo taro sa o thema membrora, vakergja o generalno sekretaro an o NATO o Jens Stoltenberg.

„I Makedonia ko sig vakti ka ovel North Makedonia , a odova si pučiba so ka ovel akala divesa. Sikavgjem kaj šaj te faisalkera o problemoa so isi amen. Akava ka bičhavel lačhe vibracie thaj informacie an o regiono kote panda isi tikne problemoa. Amen sem hazri , amen sem akate, ka la sa o džovaplipe so avel sar membrora an o NATO. Pakajava an o efikasno implementacia an i ratifikacia" vakergja o šefi e makedonikane diplomatiake o Nikola Dimitrov.

FaLang translation system by Faboba

Mangava te vakerav

Momentalno Online

       Isi 79 misafirija so dikhena o ROMATIMES.NEWS

o Vakti

 booked.net

Majpopularno

Flag Counter

Amaro brojači genjela taro 13.01.2019
Gejnela isto manuša tari koja phuv drabarena amaro portali
Majtele isi sa-ko-sa kozom dikhle o portali