Muzika

O Ferus vakergja dži kana planirinela te bašavel

O thagar e saksafoneske Ferus Mustafov, so si aktivno an o muzikakoro palno, panda kerel instrumentalno performansia pire saksafonea.

Maškar o aver ov si akate an o sako vakti te del suportho sa okole terne muzičarenge so kamena te sikljoven o džanlipa akale specifično instrumenteske.

-Avena terne čhave . Isi but čhave so me sikavgjum olen. Akana bašaven profesionalno. Ma te anavkerav olen , numa ake miro unuko taro miro majphureder čhavo. Isi man taro Veles šukare studenti o Majkl. Palo odova o Džaferi , o Iso em but avera.
Sine man thaj tari Amerika duj džuvlja . isi man em tari Australia so sikavav len sine. Sa ola but šukare sikavgje pe, vakerel o Ferusi.

Trujal so si ov promovirime sar Thagar e saksafoneske , o korkoro Ferusi vakerel kaj ov panda sikljovela. Sar so notirinel o dživdipa si bari škola thaj sako drom sikljovaja neve bukja. Ko pučiba dži kana planirinel te bašavel o Ferusi vakerela:

-Dži kana ka bašavav? Sa dži kote o Devel vakerel te bašavav thaj palo odova te čhinavav, sa dži kote ikeren man mire pire thaj vasta ka bašavav. vakerel o Ferusi.

Akana sig vakti o Ferusi sine kotor taro jekh video proekto so kergje le o "Bumbari Bend" sebepi olengoro jubileo 25 berša aktiviteti an i makedonikani muzikakiri estrada.

Gitar Art Festival - GAF: Šemšeko taro gitare thaj i sasti magia taro flamenko

Gitar art festival (GAF) akava da berš 20-to drom jubilejno ka visitkerel i memoria taro o nacie kote majšukar odova arakhel pe an i muzika. Si li odova forma taro jekh dživdipa prekal o magično flamenko - jazz jali romano toni taro swing fenomenalno kombinacia taro temepramenti jekhe naciake thaj o džanlipa olengere virtuosenge.

O Rosenberg Trio tari Holandia si jekh taro majšukare representia Р odole inficirime romane toneske kote an o europakoro than presentiringja le thaj promoviringja le o fenomenalno Džango Rajnhart o šemšeko kote trin e naencar jekhto thaj majpakjavutne jekhutno jazz gitaristi so sine le piri presia upral pire kolege tari aver rig e okeaneske . Numa thaj o Rosenberg Trio o phralja so si len interesno anava - Štokelo an i gitara, Noni an o kontrabasi thaj o Nuše an i ritam gitara so ko 13 mart bašalgje an i Kombakt Arena ko GAF festivali.

Ko olengiri muzikakiri presentacia isi taro sa po hari sar mix - rumunsko, hungariakoro, balkansko, romano folkloro, soske ola si Manuša, Roma tari Europa so bašaven o ritmia e muzikake taro pire dada thaj papua. Tegani maškar olenfde iklilo o Džango thaj sikavgja sar odova kerela pe thaj formiringje jekhutno unikatno muzikakiri čhib kote o ritmi taro amare purane dada kergja i forma swing.

Odolea taro folk uli jazz varianta an i europakiri forma. O gitare ale ko angluno plani, a o bašaviba ulo than kone o naja ujrana sine prekal o žice majsig numa o auto trke an i Monca.

O Rosneberg Trio si sar extra klasa representia taro unikatno stili so bašavena pendžarde melodie , numa sako drom prekal piro stili. Sine len bašavipa sakote (an o Beograd sine duj droma) taro „North Sea Jazz“ festivali dži ko njujorško „Karnegi Hall„sakote liparibaja laj i legenda si jekh thaj jekhutni.

Te mangljan te sikljove thaj te have o Romano jazz , startujn taro Džango, o majšukar gitaristi taro savaktia, vakerel o Štokelo Rosenberg so počmingja te bašavel gitara taro pire 10 berša. Kana počmingja te sikljol te šunel e Džango ov siklilo sako oleskoro solo bašavib adži ko agorutni detali , emitacijaja sa oleskere variante thaj odova sikavel kaj si but lačho fakti te dikhel pe olengoro koncerti.

Trijal o Romano swing ko trendi si thaj o flamenko pa odoleske an o Gitar art festival reslja te anel jekhe taro majšikar an o akava stili o pendžardo flamenko gitaristi o Vinsente Amigo so ikergja piro koncerti an o 12 mart ki odoja hala. An i piri kariera o Amigo duj droma bašavgja an o Beograd thaj palem iranel pe palo 10 berša te presentirinel pire numere taro o albumi “Memoria de los sentidos”. An o akava albumi akava artisto iranel pe an o tradicionalno darhie taro flamenko thaj dela respekto aso piro profesori thaj amal o Paco de Lusia numeraja Rekviem.

I estradno čeren Ivan Kurtić ilustiringja so nakhavgja ko oleskoro giljajbe ko romane bijava

O Ivan Kurtić sar giljavutno giljavgja ko pherdo bijava thaj sar so vakerel ko buteder olendar angleder sine phanle lafia bašo prandina thaj ov si but bibahtalo taro odova fakti thaj holjamo e jerienge so keren odova pire čhavenge.

"But droma giljavav ko bijava kote sine angleder phanle lafia prandibaske, a majbut ko majterne Roma. Pobuter olendar sine but bibahtale terne čhave so na sine pučle bašo odola prandina soske o jeria angleder phanle pire lafia e prandinenge. Ko krlo ačhola mange knedla kana dikhav odola momentia ko bijava thaj olengiri bari bibaht ko than te oven o majlošale an i lumia.

Buteder ko odola bijava ikljon em skandalia sar egzamplo ko than i terni bori te na iklili pe mueja. But droma džanel te agorkerel o bijav konfliktoa maškar o duj familie.
O vakti taro asavke phanle lafia prandinake trubul te našavgjoven thaj ma te oven asavke bijava" vakerela o Kurtić.

O orkestri taro Džambo Agušev an i manifestacia Zlatna Buba Mara 2019 reslja o phursako: "Majpopularno pleh orkestari bašo 2018"

Sar beršencar napalala i publika geli peske thaj tari i manfiestacia "Zlatna Buba Mara" so ikergja pe palo 22-to drom i VIP Arena Boris Trajkovski telal o moto " Te predajna aemn e muzikake, zabavake thaj asajbaske"

Sar sako drom tari akaja manifestacia akava da berš o majnevo naklja an i lačhi atmosfera .

Trujal sa o dende phursakoa tari Buba Mara ko diferentno kategorie agjaar akava da berš an i kategoria " Majpopularno pleh orkestar bašo 2018 " sine notirime e orkestar so beršencar napalal jekh taro majšukar na salde an i Makedonia numa em ko regioni thaj buvleste o Orkestar taro Džambo Agušev.

Ola nekobor berša napalal si majšukare ki pli buti thaj si but rodime avrial an o internacionalno nivelo.

FaLang translation system by Faboba

Mangava te vakerav

o Vakti

 booked.net

Majpopularno

Flag Counter

Amaro brojači genjela taro 13.01.2019
Gejnela isto manuša tari koja phuv drabarena amaro portali
Majtele isi sa-ko-sa kozom dikhle o portali