Pali akaharin taro organizatoria o Esmas Bend  sine len koncerti ko EXIT em agjaar lošakergje sa e publika em fania tari legendarna Esma.

Sine rat lipardi e Esmake,  giljaven pe sine em  bašavena pe sine sa o majbare hitia taro Esma so nikana na čhinavdile te šunen pe. Sar jekhutnno džuvljano vokali so sine educirimi tari Esma sine i Eleonora Mustafova em giljavgja perfektno, a sine uravde ko šalvare tari Esma si olake dengja olen. O orkestar Brakja Nune  em o bendi kergje saste remek delo ko bašavipa em o neve aranžmana taro “ Zošto si me majko rodila”, “Romano horo”, “ Mangava tut”, “Čhae Šukarie” em but aver hitia so i publika gljaven len sine lencar.

Akava koncerti sine panda majbaro motiv o šefi e bendeskoro o Simeon Atanasob  te kerel panda buti ki pravda te ovel promovirimi em te pherel o amaneti dendo tari Esma thaj Stevo Teodosievski.

O lil „Pitao sam malog puža“ (lil liparde bašo Šaban Bajramović) taro sociologo em romologo profesori D-r Dragoljub. B. Gjorgjević taro Niš sine presentirime anglal duj berša.

O autori e lileskoro kergja zori sociološko te definirinel o fenomeni taro Šaban Bajramović ki orginalno forma . ikavde orginalno lafjora so si kerde sar arhaizmo em lokalizmo . Amen taro dur vaktia notiringjem kaj amaro niško manuš si vašarlia, kafančerosi, golootočniko, barbutaši, džvljomanglutno, gjiuzlukčija, kukuleleko em filmadžija.

Šaban Bajramović ko jekh sine etiketirime sar nagarazlia, domačini, so dela arka, srpsko Rom em patriotiu, ama na sine odova so mangel but o love, cicija em nikana na sine romano žigolo, akcentirinela o Gjorgjević.

O autori vakerel kaj “Pitao sam malog puža” motivirngja te hramosarel sebepi o kerdo esei taro britanisakoro kolumnisti o Gart Kartrajt anavkerdo sar “Šaban Bajramović - trošadžia divdipaske”

I jazia taro Barjarmović sine te kerel khanči peske, amenge em savorenge em e muzikake. Ov sine majbut respektirime avrial tari them nego so sine akate.
O Šabani mora sine sar so vakerel o Gjorgjević sar čhavo te kerel buti mareske, em te ovel amaldžia em moleri.

- Oleskoro sine ko vakti sar askeri te dezertirinel, te džal ko Goli Otok e Alija Izetbegovičea te phagel bara, te sikljol te giljavel em te bašavel ko nontrabasi, oleskoro sine te giljavel le “Phanlo sium” em te ovel ko 12-to than ki internacionalno muzikakiri lista ko 1965 berš.

Te kerel 700 gilja te ovel sakote ki lumia salde na ki Australia, te ovel ki lista internacionalno muzika ko magazini „Time“ em te ovel notirime sar „Thagar romane muzikake“ akcentiringja o Gjorgjević.