Jekh purani legenda vakerela, kana thaj soske o Roma gele tari India. I paramis vakerel kote ola dživdinen sine trujal i len Gang, a olengoro thagar sine but zoralo kaskoro lafi šunel pe sine but dur thaj oleskoro lafi trubul sine te respektirinel pe.
Sine le jekh čaho kaskoro anav sine Čen, thaj sine leske sa ko oleskoro dživdipa. Ki them Ind dživdinel sine jekh thagar kaske i romni bijangja leske jekhe čhaja, kaske dengje anav Gan. Angleder te merel o dat e čhijakoro, dengja molba dži ko javer thagar te lel leskere čhija e Gan ko plo kher thaj te bajrol uzal oleskoro čhavo, soske olende ka počminel baro maripa. Kana mulo o dat e čhijakoroola sine la efta berš. Palo ofto berša o Čen manglja te lel la romnjake. Sa o Roma so sine olea mislinen sine kaj oj tani oleskiri phen, em odoleske na mangle odova te kerel em mangle te džal peske olendar, te na anel bibaht e Romenge, sar so ulo olengere komšienge.
Okola so džanen sine kaj o Čen thaj i Gan nane phral thaj phen sine odoleske te prandinen pe, a okola so na džanen sine odova sine kontra. Isto problemia kerel sine o plemensko pastori so sasljarel sine nasvale manušen. Ov dikhlja ko suno kote te prandingje pe o Čan thaj i Gan o Devel ka mudarel olen thaj ka bičhavel askeri te tharel olen.
Kana dikhle o Roma kote nane šanse te dživdinen barabutne jekh jevend ola hulavgje pe, agjaar so o Čen pe romnjaja thaj aver Romencar so respektirinen le sine gele ki aver them. Okola so na mangle ačhile ki them Ind. Kana o Čen chidingja drumo, o plemensko pastori dengja arman kote milja beršencar te phirel tari them ki them , thaj te našti piel pani duj drom taro jekh than.
Kana nakhle 1000 berša sar o Čan gelo tari India, nesar sar te čhinavgja pe i arman, pa odoleske o akanutne Roma, na phirena but, isi len ple khera, kote dživdinena. Majphare si so o Roma na irangje pe pobut ki piri them India.
