Осумгодишни браќа близнаци лежат на стар душек во трошна куќа во населбата Врела Рибничка во Подгорица, а околу нив летаат роеви муви. Не зборуваат, не мрдаат, не се смеат. Тие не можат да се жалат на болка. Церебралната парализа, од која боледуваат и двајцата, не била навреме лекувана. Нивните животи сега се сериозно загрозени.
Не добиваат помош од државата, бидејќи се без државјанство - немаат државјанство или лични документи, иако се родени во Црна Гора. Нивниот татко Бидаим дошол од Косово пред 24 години. Мнозинството лица без државјанство во Црна Гора се припадници на ромската и египетската заедница. Тие трпат повеќекратна дискриминација, немаат можност за здравствено и социјално осигурување, право на инвалидски надоместоци, на вработување...
Бидаим не успеал да добие документи во Црна Гора, бидејќи не бил регистриран ниту на Косово и тука дошол без документи. „Кога се родив, татко ми не ме пријави, се предаде на алкохолот и не се грижеше за мене. Тоа ме одбележа мене и моето семејство до крајот на мојот живот, бидејќи бездржавјанството е наследно. Сега не знам како да ги добијам документите и да им помогнам на моите деца“, вели тој за Центарот за истражувачко новинарство на Црна Гора (ЦИН-ЦГ).
Близнакот кој е неколку минути постар, помалку напредува. Јаде само кашеста храна и има големи болки. Тој дури и не комуницира со очите во загушлива просторија. Деноноќно за нив се грижи втората сопруга на Бидаим, Даниела. Биолошката мајка ги напуштила близнаците веднаш по раѓањето.
