O thavdipa e kontraktoske maškar i Barselona thaj o Lionel Mesi te džal majodorig khelibaja arakhen pe an i agorutni faza, pa o Argentinco ko avutne deš divesa ka šaj oficialno čhivel piri signatura ko nevo kontrakto so ka ovel dži ko 2022 berš. O aktuelno kontrakto agorkerela ko juni 2018 berš, numa o kataloncia na mangen te keren riziko soske akava nilaj khuvel ko agorutne 1‚2 masekoa taro purano kontrakto thaj palo odova te arakhen pe an o riziko te džal peske bizo desavo klauzula. O anglutne informacie kaj o Argentinco irangja 35 milionia eura beršeskiri plata sine demantirime taro oleskoro dat (ov si oleskoro agenti)
thaj taro legaripa e Barsake, a o katalonsko mediumia vakeren kaj o duj riga si paše ko sasto nevo kontrakto. O Mesi akale kontraktoa ko avutne pandž sezone ka lel 30 milionia eura ki sezona. Ko kurkeskoro nivelo oleskiri plata ka ovel 276.000 eura thaj odova te hulavgja pe matematički majodorig o Argentinco sako sekunda ka lel paše po 1 euro (jalči majprecizno iskalkulirime si 0.95 centia an i sekunda). Akava si šukare e duj rigenge , i Barsa ka ovel sigurno kaj ka ačhol olakoro majšukar fudabkeri panda 5 sezone, a o Mesi ka resel majuči em pobari plata taro kristiano Ronaldo, thaj klar si soske o kataloncia javljaren kaj i signatura taro nevo kontrakto si siguritetno thaj ka ovel kerdo ko akava masek.
