Paše 70 romane familie kote baro numero thaj čhave ko 22 maj ko kurko, tromale protestirinen sine anglal memorialno komplekso an o Berlin, so si čhivdo sar nišani lipa taro Holokausti upral o Roma thaj Sinti ko vakti taro 2-to Lumiakoro maripa
O mesaži e protesteske sine "Amen siem akate" so mangle te iranen i sama taro germansko Bundestago tari dar so isi lungo vakti thaj i deportacia ko ple matično thea sr so si Albania, Kosovo, Srbia, Makedonia, Bosna thaj Montenegro. O protestantia rodena sine te stopirinel pe i decizia baši deportacia.
O protesto sine organizirime tari organizacia taro Kenan Emini thaj o „Alle Bleiben" . „ Sa o Roma an i Germania si len statusi sar Duldung Abšibung , thaj okola da Roma taro Kosovo so ale angleder 20 berša akate panda nane len faisali olengere statuseske, thaj sis šanse te oven deportirime napalal ki them kotar so ale" vakerel o Kenan.
Trujal so o Bundestago thaj aver europakere thema angje decizia o Thema taro Balkani si siguritetno thema, o realiteti si aver čhane. I germania upral i funda so si andi akaja decizia sa o Roma taro akala thema si thanjarde an o kampia so si anavkerde sar "Balkansko kampia" thaj hulavde taro aver kampia. Ko akala kampia okola so roden azili ačhon odothe sa dži kote na dikhel pe olengoro rodaripa bašo azili , numa odova si sar napakjabaskiri misia soske 100% taro aplikantia sa olengere rodaripa si irame sar bizi funda.
