АВАЈА претставува граѓанска иницијатива која ги артикулира и промовира интересите на граѓаните Роми до засегнатите страни. Оваа кампања поврзува 10.000 граѓани Роми од 14 градови од државата со цел да го обединат гласот за интересите на заедницата.
Ромите се граѓани во оваа држава и бараат активно да учествуваат во демократските процеси и носењето одлуки. Во изминатиот период, Ромите беа “влечени“, “купувани“ и “манипулирани“ да го дадат својот глас за интересите на другите. Многу политичари доаѓаа и ветуваа дека животот на Ромите ќе се подобри меѓутоа сеуште не го гледаме резултатот во заедницата. Од истражувањата поврзани со избори и излезеноста на Ромите, може да се забележи дека 60% од испитаниците учествувале на претходните претседателски избори и имаат доверба во институцијата претседател на државата.
Со тоа, оваа иницијатива за претстојните претседателски избори има за цел да ги поттикне гласачите Роми да учествуваат на изборите и да бидат дел од одлучувачите. Со учеството на изборите Ромите имаат можност да ги пренесат своите колективни интереси кои ќе бидат дел од барањата до кандидатите за претседатели на државата.
Ние Ромите водени од аргументите на несоодветна правична застапеност во државната и јавната администрација како и недостатокот на системски решенија за проблемите на Ромите забележани од страна на националните и меѓународните организации, сметаме дека државата треба да вложи поголемо внимание и напори за решавање на проблемите кои ги засегаат Ромите и вклучување на ромската заедница во општествените текови.
По консултација со граѓаните Роми, со цел за поголема вклученост на Ромите во општествените текови а воедно и гаранција за успех на иднината на државата, АВАЈА, како граѓанска иницијатива која има за цел да го артикулира гласот на ромската заедница бара
- Ромите да бидат минимум 2% застапени во државната и јавната администрација до 2020 година со цел да се запази правичната застапеност по институции особено министерствата
- Двојна буџетска алокација за решавање на проблемите на Ромите до 2020 година
- Двојно поголема реализација на капиталните инвестиции во ромските населби до 2020 година
