Истражување на „Галуп“ покажува дека над 70 отсто од луѓето на Балканот веруваат дека коронавирусот не претставува толкава закана како што се претставува. Истражувачите велат дека ова и можеше да се очекува во регион кој е навикнат на кризи, објави „Дојче веле“.
Според истражувањето, 62 отсто од луѓето во светот се плашат да бидат заразени, но во исто време дури 56 отсто мислат дека заканата не е толку опасна како што се тврди. Овие резултати ги доби Агенцијата „Галуп“ врз основа на анкетирање на 20.000 лица во 26 земји.
Претседателот на „Галуп“, Канчо Стојчев, смета дека резултатите не се контрадикторни, како што делува на прв поглед.
На Балканот сè уште нема многу страв, барем во испитаните три држави. Според анкетата, во С. Македонија и БиХ дури 73 отсто од луѓето сметаат дека вирусот е претставен поопасен отколку што е, во Бугарија 72 отсто и го мислат тоа.
„Балканот со векови е важен центар. На вакви места, интензитетот на историјата е значително повисок, што значи дека тука имало повеќе кризи што требало да се надминат“, истакна Стојчев.
Спротивно на тоа, во Западна Европа дури 70 отсто од луѓето сметаат дека вирусот претставува голема закана.
