Со попишување на дијаспората в понеделник 1 март официјално почнува пописот. Иселениците ќе можат апликацијата за самопопишување да ја најдат на веб страницата на Државниот завод за статистика, а линк до неа ќе постави и Министерството за надворешни работи.

Помош за пополнувањето на апликацијата иселениците ќе можат да добијат и од сите дипломатско-кознуларни претставништва кои веќе добиле инструкции и отвориле телефонски линии кои ќе им бидат достапни 24 часа.

„ Апликацијата е достапна на осум јазика. Оние кои се подолго заминати ако имаат проблем со разбирање на јазикот , ќе може да се попишат и на англиски јазик“, рече министерот, Бујар Османи и објасни дека иселениците ќе можат да се попишат и од мобилен телефон.

Министерот Османи нагласи дека резултатите од попишувањето на иселениците се од исклучителна важност за државата.

Директорот на Државниот завод за статистика Апостол Симовски рече дека апликацијата е лесна и едноставна за пополнување, идентична на онаа по која ќе се попишува и во државата, а податоците од иселениците ги чекаат заклучно со 31 март.

„Процесот на попишување ќе биде преку веб – апликација која е едноставна. Секој во странство лесно може да ја пополни. Единствен услов е да се најави со својата имејл адреса. Пристап до апликацијата од Македонија нема, а за податоците што ќе ги остават преземени мерки со кои ќе бидат заштитени.

Од понеделник почнува попишувањето на уште пет категории граѓани односно во соработка со Министерството за одбрана почнува попишувањето во Армија, во соработка со Министерството за правда почнува пописот на лицата во казнено поправните установи, а во соработка со Министерството за труд и социјала во истиот период, ќе се попишуваат и лицата во воспитно – поправни домови.

fShare

Tweet