Последната акција во која беа запленети мобилни телефони, ножеви, дрога, пари... во затворот во Идризово, ги покажа недостатоците на системот, но исто така и можната вмешаност на службени лица во внесувањето на недозволени предмети.
Народниот правобранител Насер Зибери на прес-конференција откри дека за на осудено лице да му се внесе мобилен телефон, затворските чувари вработени во затворот наплаќаат од 200 до 500 евра зависно од казнено поправната установа. За тоа дали некој ќе одговара, Зибери вели дека ако се утврди лична одговорност ќе биде спроведена, но работата на правобранителот е да укаже, а не да казнува.
За ресоцијализацијата омбудсманот рече дека не е на ниво и дека констатиран е недостиг од кадар од оваа област. За притворени лица, вели дека најголем проблем е и времето што го минуваат надвор, односно само 2 часа, 22 часа минуваат во затвор.