Aso Prespansko kontrakto thaj ustavno kanoni an i implementacia an o trampe an o dži akanutno makedonikano ustavi, o nevo notirime anav e themake North Republika Makedonia, akana si oficialno kana e grciakoro parlamento ratifikujngja o protokoli bašo membripa e Makedoniake an o NATO.

Aso o prognoze i Makedonia thaj oficialno bašo nekobor divesa ka ovel Republika North Makedonia.

O Govermento si le formirime Interresorno grupa so trubul te kerel o Nacionalno akciakoro plano baši implementacia e majodorigutne aktivitetoa thaj an o rok bašo efta divesa e themakere institucie, simantrakere nakhiba thaj diplomatsko -konzularno institucie thaj ofisia ka trubul te čhiven table e neve anavea tari i them - Republika North Makedonia

Taro Govermenti na udžarena problemia an o themakere institucie kana ka istemalkeren o nevo anav e themake.

Kobor ka moldinel o nevo proceso taro Govermento aknaske na vakerena , numa vakerena kaj sa odova ka džanen kana ka agorkerel o sasto akti thaj procedura.

I trampa e Ustavno anavea tari Makedonia avel kana sine čhivdo o paraf thaj i signatura taro Kontrakti tari Prespa thaj oleskiri ratifikacia an o parlamentia taro o duj thema. Palo 27 beršengoro spori maškar i Grcia thaj Makedonia akana trampinen o anav tari "Republika Makedonia" an i " Republika North Makedonia".

Dži ko 27 akava masek trubul te arakhel pe i firma so ka kerel o softver , (aplikaciono faisali) e eksperimentalno operacia - gejniba e dizutnen, familie thaj khera an i Makedonia. E themakoro ofiso baši statistika angleder 2 divesa hramosarda akharin , solea oficialno starto ko hazrkeriba bašo statsitikani operacia - gejniba e dizutnen so ka ovel kerdo eksperimentarno so ka ovel an o aprilo thaj o oficialno popis ko april o aver berš.

„Akana rodena pe faisalia baši aplikacia faktea so akaja statistikani operacia ka ovel kerdi prekal transmiterno kompjuteria. O eksperimaentalno popis ka ovel ko 16 dizjka thaj 16 gava, a ko kotor kaj si ikavdi i grafa - etnikano preperutno o agorutni decizia ka ovel notirimi taro Parlamento. Amen vakergjam amaro dikhiba thaj opcia" vakergja o Direktori taro Ofiso baši statistika o Apostol Simovski.

An i tendersko dokumentacia šaj te dikhen pe nesave pučimata so trubul te ikerel i aplikacia. Sar egzamplo, moduli taro informacie e personake, thaj pučiba so trubul te den antvorot o persone so ka oven evidentirime si dajakiri čhib, themutnipa, ka oven pučle kobor vakti dživdinen ki odoja adresa, i persona iranel pe li an i familija buteder taro duj droma ko masek, ekonomikano statusi, savo transporto istemalkerel te resel dži ko piro bukjarno than jali škola, sar dživdinel kotar leske love thaj aver. I grafa etnikano preperutnipa nane ikerdi ki tendersko dokumentacia e softvereske.

Taro themakoro ofiso baši statistika vakergje kaj šajdutne si kana ka ovel o popis te na oven pučle baši etnikano thaj religiakoro preperutnipa, soske sar so vakerena odola informacie nane len nesavo abro praktikano moldipa numa šaj te oven politikane involvacie.
„Dži kana na sine nikana jekh popis a te na ovel politizirime, a majbut politizirinel pe i etnikani komponenta. Odoleske siem hazri te distancirina amen taro desave aspektoa , numa politizacia nane te mukha te ovel. Te notirinav, akava si statistikani operacia. Aso amaro Ustav , o niamia taro desavi grupa dizutne ikljola tari i čhib so keren lafi, a na taro etnikano preperutnipa" vakergja angleder desave masekoa o Simovski.

O agorutno epilog ka trubul te vakerel o Parlamenti aso o nevo kanoni bašo Popis , trujal so zorale isi reakcie ko fakti kaj ka kosel pe i grafa - etnikano nacionaliteto. faktea so an i them nane te ovel la percepcia o procento taro etnikumia so dživdinen an i Makedonia.

I sasti akaja operacia taro popid trubul te ovel 8 ½ milionia eura , so si but pohari taro okola 14 milionia eura taro nasukcesialo kerdo popis an o 2011 berš. O nasukcesialo popis aktueliziringja le thaj o SJO kote trujal i funda taro o snimke taro o bombe phravgja rodaripa bašo Nikola Gruevski thaj Ali Ahmeti telal šubikerin kaj ola teleperavgje o oficialno pozicia thaj kergje zijani an o budžeto bašo 2.8 milionia eura

Agorutno popis an i them sine ikerdo ko 2002 berš thaj i Makedonia si jekh taro raritetno phuvja an i lumia so e manušen na gengje olen pobuter taro 17 berša.