O Roma tari Ukraina so si imigrantia vakeren kaj si dikriminirime
Milja Roma tari I Ukraina arakhen pe ko nadžanle avutnipaja ki šerutni diz ki Moldavia Kišinjev soske pobuter lender si bizo dokumentoa.
I Kristina (41) si jekh olendar, Oj nađavgja sa so sine la kana I Rusia bombardiringje olakoro kher ko purabalo kotor tari Ukraina ki diz Harkov.
„O Harkov si ramno akana sar mo vast. O khera e manušengere ko centro dizjake si pervade em tharde em nane akana khanči” vakerela oj baši Al Džezira.
Sebepi o bombe so peravgje olakoro kher so sine ola sa so šaj kergja sit e lel pe čhaven em te našel. Akana si ko maškar drom, bizo dokumentoa em nadžanel so ka kerel akana oj.
„Kana ka perel bomba upral tumaro kher em šunen o tenko sar phajrarel so ka len tumencar majanglal, e dokumentia jali e čhaven” pučela oj.
I Kristina chidingja srumo taro Harkov dži ko Lviv, a palo odova dži ki simantra e Moldavijaja. Ama odoriga, vakerel oj nakhlja 4 dive avrial ko šudro udžaribaja te khuvel ki Moldavia , bizo hajbe em pani.
Kana arakhlja than kaj te khuvel em te bešel oj em o avera Roma sine paldime taro olengere šatoria taro ukrainsko simantrakere bukjarne. I Kristina si salde jekh taro 400.000 ukrainsko Roma so trujal e maribaskere trauma ola si em diskriminirime ko vakti tari evakuacia avrial tari Ukraina.
