Основното училиште „Малина Попиванова“ во Кочани е носител на активностите од два проекта за спречување на раното напуштање на основното образование од страна на децата Роми, како и за одржлив развој на учениците.
Проектите се реализираат во рамки на Еразмус + програмата, имаат меѓународен каракатер, а вклучени се партнерски училишта од Хрватска, Бугарија и Грција, како и невладините организации „Авена“ од Кочани и „Еко логик“ од Скопје.
– Проектот „Воспоставување систем за следење на раното напуштање на училиштата од децата Роми“ ќе се реализира во два дела, од кои едниот е подготовка на наставни материјали за часови, а вториот подготовка на онлајн-платформа со веќе готови проблематики и нивно решавање. Целта е да се превенира раното напуштање на образованието од страна на учениците Роми. Платформата ќе ја подготвуваат психолози и педагози, а во подготовката на наставните материјали ќе бидат вклучени наставниците од нашето и од партнерските училишта од Грција и Бугарија. Со вториот проект се дефинираат 17 цели за одржлив развој на учениците, а наставните материјали и онлајн-платформата ќе ги подготвуваат нашите наставници и ќе се применуваат и во партнерските училишта од Хрватска и Бугарија, истакна Сања Михаилова, координаторка на проектите.
