Здружението Иницијатива за правата на жените од Шуто Оризари ја истакнува својата загриженост во врска со последниот случај за кој беше запознаена јавноста, каде почина 26 годишна родилка. Во период од пет месеци во ова родилиште може да се забележи веќе втор случај на почината родилка за време на породување.
Министерство за здравство во самото соопштение наведува дека констатирале со увид во извештаите во електронската база Мој термин дека станува збор за недоволно контролирана бременост, со само една претходно контрола во 30-та недела од бременоста, кога првпат е утврдено присуство на висок притисок.
Ваквите наводи во соопштението од Министерството за здравство се целосно спротивни на нашите информации. Имено, според нашите информации таа редовно ја контролирала бременоста кај матичен гинеколог и тоа не само со еден преглед, туку со седум прегледи од 30-тата гестациска недела до моментот на породувањето..
Ваквите случаеви и контрадикторните информации оставаат простор за сомнежи за третманот, приемот и породувањето во СБГА Чаир.
Ги повикуваме Министерството за здравство, Државниот здравствен и санитарен инспекторат и надлежните институции да спроведат детална истрага за случајот со починатата родилка во СБГА Чаир.
Исто така, го повикуваме Министерството за здравство да спроведе едукации заедно со патронажните служби за важноста на антенаталните прегледи во репродуктивен период.
Воедно ги повикуваме и жените Ромки редовно да ја контролираат својата бременост, односно редовно да посетуваат матичен гинеколог и редовно да ги извршуваат гинеколошките прегледи.
Здружението Иницијатива за правата на жените од Шуто Оризари изразува длабоко сочуство до семејството и најблиските на починатата родилка.
