Скопјанецот Тони Сали, 19-годишниот матурант со одличен успех кој почина лани во мај уништен од државата која никогаш не му го призна биолошкиот татко и не му даде матичен број и лична карта, победи пред Врховниот суд. Неговата адвокатка Тамара Славеска-Апостоловски, доделена од Министерството за правда како бесплатна правна помош, по неговата ненадејна смрт лани продолжи да ја води битката на свој трошок. Откако Граѓанскиот суд Скопје го откачи Тони Сали непосредно пред да почине, одбивајќи ја тужбата на адвокатката за утврдување на биолошкиот татко, таа не застана тука.
Славеска-Апостоловски поднесе жалба до Апелациониот суд Скопје. Но, и оттаму го одбија барањето за утврдување на татковството, пресудувајќи дека Граѓанскиот суд Скопје не бил надлежен за такво нешто.
Адвокатката по оваа одлука на Апелација, тврдејќи дека токму Граѓанскиот суд е надлежен за утврдување на татковство, што ќе беше и решение на долгогодишната битка на Тони Сали и мајка му за веднаш да добие матичен број и да биде впишан во Матичната книга на родени, поднесе барање за ревизија до Врховниот суд.
Денеска таа го добила решението на највисокиот суд во Македонија, дека адвокатката и Тони биле во право.
„Ревизијата се усвојува, Врховен суд потврди дека Граѓанскиот суд бил должен да постапува по тужбата на Тони Сали за утврдување на татковство и мајчинство, а не да ја отфрли! Правдата ќе стигне, полека но сигурно, макар задоцнето!“, изјави за адвокатката Тамара Славеска-Апостоловски.
Одлуката која ќе помогне на многу фантоми родени во Македонија да добијат матичен број и да почнат да ги остваруваат своите основни човекови права ја донеле врховните судии: Шпенд Деваја, Мирјана Радевска – Стефкова, Исамедин Лимани, Лидија Мартинова и Наке Георгиев.
Но, Тони Сали веќе го нема.
