Цената на лебот минатиот месец се зголеми за речиси една петтина во Европската унија, а како главна причина за тоа се наведува војната меѓу Русија и Украина, кои се сметаат за двете главни извозници на житарки и вештачки ѓубрива.
Просечната цена на лебот во ЕУ беше за 18 отсто повисока во август 2022 година отколку истиот месец лани, покажаа податоците на Евростат. Во август 2021 година, просечната цена на лебот се зголеми за 3 отсто на годишно ниво, соопшти Евростат.
Унгарија и Литванија забележаа највисоки годишни промени во просечната цена на лебот, со зголемување од 66% и 33%, соодветно.
Земјите со најнизок просечен пораст беа Франција со 8%, и Холандија и Луксембург кои забележаа пораст од по 10%.
Во која земја од Западен Балкан најмногу поскапе лебот?
Поскапувањето на лебот е најновиот проблем со кој се соочуваат граѓаните, не само во Македонија, туку и во останатите земји од Западен Балкан.
Во однос на земјите од Западен Балкан, Албанија е земјата во која лебот најмалку поскапе, додека во Црна Гора цената на овој главен прехрамбен производ е двојно зголемена, објави Радио Слободна Европа.
Имено, лебот во Албанија поскапе за 20 отсто, па сега жителите на оваа земја го купуваат по цена од 0,51 евро (31.67 денари). Лебот во Србија поскапе за четири отсто повеќе од Албанија, а граѓаните за него плаќаат 0,42 евра (26.08 денари).
Во Босна и Херцеговина овој производ чини 0,79 евра (49.05 денари), што е за 35 отсто повеќе во споредба со лани.
Исто процентуално поскапување има и кај нас, каде во продавниците веќе нема „нормална“ големина на пченичен леб под 0.81 евра. Во Косово оваа основна храна поскапе за 39 отсто, а граѓаните можат да ја добијат за половина евро.
Link : https://www.slobodenpecat.mk/vo-koja-zemja-od-zapaden-balkan-najmnogu-poskape-lebot/
