Roma Times: I Avaja ko akava periodi dopherga ko piro anav panda jekh dopherdo anav – O Roma baši Demokratia - Roma for Democracy ? Kobor akava dopheriba sine le presia ki trampa taro anglutno legaripa taro akanutno aktuelno legaripa?
Selvija Mustafi: I Fondacia o Roma baši Demokratija si nevo entiteto em haing neve pakjajbaske resaribaja te kerel majzoralo demokratsko participacia e Romenge ko sasoitnipa, a i Avaja sar inicijativa so si kotor tari i fondacia. Jekh taro resarina e fondaciakere si te del suporto e individuenge, naformalno grupenge, asociacie em mediumsko portalenge so ka keren promocia e Romenge ko buvljaripa an i demokratia.
O formiriba e fondaciakoro na sine la presia ki trampa taro legaripa taro anglutne lideria numa phravdilo nevo than jekhe majbuvleste horizontoske em barabutno aktiviteto prekal konektiriba manušen taro aver regiona an i them so si len baro potenciali ko zorakeriba e jekhinake.
R.T. Ko si akana ko legaripa ki Avaja, em si li odothe taro anglutne lideria tari Avaja?
S.M: I Avaja si ki evoluciono faza kote isi trampe taro pobuter aspektoa, so si apsolutno saste procesoske. Ko legaripa si amen manuša so sine angleder ki Avaja , numa em panda but avera numa avera so ko nakhle 4 berša sine len šajdipa te oven lideria ko lokalno nivelo em te bajron ko sasto proces te šaj resen ko legarutno nivelo. Odova so si konkluzno ko sasto proces ko butikeriba si amaro mangipa te kera buti bizi diferenca ko si lideri , soske i resarin ko agor e diveseske si jekh a jekh,, salde o fokus si diferentno, Jekhe rigatar si amen o sig kotora taro romane mahale, ko buteder komune a taro aver plitikane organiziriba em presie.,
R.T.: So si akana o fokuso ko aktivitetoa tari Avaja?
S.M.: Sar angleder da i Avaja fokusirinela pe ko 3 šerutne elementia, a odola si:
politikani edukacia, politikano lejbe than thaj reprezentacia.
Ko nakhlo vakti sine amen šajdipa te dikha sako forma taro manipulacie kana si vakti taro alusariba. Taro sa odoova sar šerutni poenta si kaj trubul majzorale aktivitetoa e hangiba tari i jekhin, politikani edukacia (sar čače te da amaro hango), participacia (soske si importantno sako te participririnel em te del po hango) em reprezentativnost bašo pobari presia ki kreacia e themakere politikenge.
R.T: So si šerutno motivi tari Avaja te bajrol ko romano politikano subjekto?
S.M.: Gindinav kaj vakti si te hava kaj trubul te ova zoraleste politikane organizirime te ova ko majuče politikane procesoa em konektirime ko pozicie so ka keren trampe ki amari jekhin.
O motivo si jekhutne , amende nane amen amari them thaj askereskoro takati te šaj demonstririnaja nesavi zor, ekonomsko siem majčoroli jekhin an i Europa, ama odova so šaj te kera si te organizirina amen politikane em te kera buti prekal tamikeriba taro takati ki jekhin. Šukrikerinaja taro amare parapapoa em lideria sar so si o Faik Abdi , amange si šajdipa na salde te gindina baši politika , numa em te ova konektirime aktivno tr la than odothe. Ki Avaja si generacia taro terne lideria so si len kapaciteto te kreirinen majlačho avutnia prekal barabutne idee em mangin te lačharen o statusi e romane jekhinakoro.
