Incidenti ki Šutka, revoltirime dizutne protestiringje em vakerena: „ Policisko patrola uštavgja Rome em na ačhile“
Ko paraštuj ko mismeri , grupa taro 500 – 600 Roma ko Šuto orizari khedingje pe ko drom Jovan Hadžišiškov sar notacia protestoske.
Faktori akale revolteske si kaj hari angleder 19 o časo vordon tari policiakiri patrola nakhavindo taro odova drom, kergja trafikoskiri bibaht kote sine ratvardo jekh manuš. Premal o lafia taro Roma, o vordon na ačholo, em gelo majodorig po drom.
O ratavrdo suportoa taro pire paše familia sine legardo ko dizjakoro hospitalo „Sv Naum Ohridski“ ko Skopje. Numa tegani ulo incidenti kote premal o lafia tari oleskiri paše familia , e ratvardeske kana sine leske dendo medicinsko suporto, sine ikavdo taro paluno kotor e hospitaleske em vakeren kaj i policia margje ole em sine legardo ko policiakoro stasioni.
Odova kergja baro revolti ko Roma tari Šutka so reagiringje ko kerdo brutalnsot , em na sine len nisavi informacia kaj si legardo o ratvardo.
Prekal naoficialno notacia tari oleskiri familia ov sine maltretirime em mardo em legardo ko policiakoro stasioni Centar, Skopje.
Akanaske nane nisave irame informacie tari policiakiri rig , soske o portparolia taro MVR em SVR Skopje, na dena sine džovapi ko telefonsko akharina tari i redakcia taro Roma Times.