Драган Мутибариќ (75), една од легендите на македонскиот спорт, незаборавниот голман на Вардар, деновиве се соочува со најтешките моменти во својот живот. Некогашниот репрезентативец и идол на многу генерации неодамна имаше мозочен удар по што остана неподвижен, врзан за постела. Драган е оставен на грижата на неговата сопруга Милица, без која како што вели би бил изгубен.
– Проблемот е што имав мозочен удар. Тоа ми се случи пред 15 дена. Ме однесоа во болница, таму лежев 12 дена. Сега сум дома, на закрепнување. Лекарите ме отпуштија и не ми кажаа што треба да правам.
Ситуацијата ми е катастрофална. Кога дојде време да се помогне, нема никој – резигниран е Мутибариќ, кој и покрај минималните примања не сака да апелира до јавноста за помош.
– Срам ми е да барам помош со некаков јавен апел. Таков сум. Инаку, имам многу мала пензија, 13.500 денари. Не можам да излезам на крај. Трошоците за лекови и за се друго се големи. Само на мојата пензија живееме со сопругата, која нема пензија – вели Мутибариќ, кој веќе седум години се обидува од Агенцијата за млади и спорт да добие еднократна финансиска помош, како заслужен спортист.
– Од Агенцијата за млади и спорт седум години ја барам таа еднократна финансиска помош, постојано ми викаат малку бодови имаш. Но, не губам надеж, повторно ќе аплицирам. Рокот сега е 22 мај, треба да ги поднесам документите и молба за да добијам таква помош. По осми пат го правам ова. Срамота е. Четири пати бев спортист на Македонија. Имам многу трофеи, награди…
Кој е Драган Мутибариќ?
Неговото име како голман најмногу се врзува за Вардар но тој беше и репрезентативец на Југославија. Во сезоната 1966/67 на голот на Вардар застана неговата легенда, незаборавниот Драган Мутибариќ. Во 1969 година беше прогласен и за спортист на Македонија. Од Вардар замина во германскиот бундеслигаш Шалке 04 (1975-1977), потоа за Трепча, одново во Вардар, потоа во Тетекс, Македонија Ѓорче Петров, како и во ФК Напредок од Шуто Оризари кога претседател беше сега покојниот Амди Бајрам, за кој вели дека беше еден од најдобрите преседатели на клубови со кој соработувал и дека неизмерно ги цени Ромите
