Од 1 јули на територијата на Европската Унија стапи на сила ковид-сертификатот за вакцинација против корона вирусот, со што при патувањата во рамки на Унијата преку QR-кодот  дигитална форма на паметните телефони или во хартиена форма, покажува дали патникот е вакциниран со една од вакцините одобрени од ЕУ (БиоНТек/Фајзер, АстраЗенека, Модерна или Џонсон и Џонсон), дали прележал ковид- 19 или има негативен тест за корона вирус.

Сертификатот служи за да се избегне потребата од карантин и понатамошно тестирање за време на патувањето помеѓу 27 земји-членки на ЕУ и придружните европски земји. Сепак, Брисел ги повикува сите земји-членки да дозволат влез само на целосно вакцинирани патници надвор од блокот или на оние со итни причини.

Пасошите за вакцинација во моментов се најбарани во Германија, а се појавуваат сè поголем број фалсификувани документи.

Државното обвинителство во Минхен соопшти дека во моментов пасошот за вакцинација е „најбараната фалсификувана стока“.

Преку онлајн платформите, како што е Телеграм, може да се стигне до таков фалсификат.

Цените на фалсификуваните пасоши за имунизација со внесени вакцини против Ковид-19 се меѓу висок двоцифрен и низок трицифрен број, се наведува во соопштението.

Постојат и „посебни услови“ за оние кои порачуваат повеќе од еден пасош.

Полицијата посочува дека овие пасоши лесно се фалсификуваат, бидејќи празни пасоши можат легално да се нарачаат, а печатот од лекарот лесно се добива.

Фалсификаторите го преземаат потребниот сериски број на вакцината од фотографиите на лицата кои биле вакцинирани и потоа се фалеле со објави преку социјалните мрежи.