„Есма беше наш амбасадор, но не акредитирана од државните институции и со одреден мандат, туку акредитирана од народот со срце и со безвременски мандат “, рече водителот Рамуш Муарем-Цирко сношти во киното Фросина во Скопје, на отварање на настанот „Во спомен на Есма за незаборав“.

Концертот кој го организираа хуманитарната организација „Кралицата Есма и Стево Теодосиевски“ и продукцијата „БТР“ беше по повод 80 години од раѓањето на кралицата на ромската и македонската народна песна, еден од нашите најголеми светски културни амбасадори.

Една од пејачките на концертот, Харија Бислим, има само 13 години, истите години на кои Есма почнала да пее, криејќи од родителите дека оди на натпреварот „Микрофонот е ваш“, на кој потоа и победила. Со чистиот вокал и богатата интерпретација, младата Харија потсетува на Есма, но за неа нема копија и замена, како што рече водителот на настанот. Настапи и дедо ѝ на најмладата пејачка, Рамадан Бислим-Рамко, познат пејач на ромската музика, а ја испеа песната која Есма со мерак ја пееше, „Свадба македонска“, и ја разнежи, но и разигра публиката.

„За нашата мајче нема замена, нема копија, таа е една и единствена. Заслужила и многу повеќе од ова“, кажаа повеќето од пејачите пред своите настапи.

Настапи и фолк-пејачката Сузана Гавазова, која рече дека Есма ѝ била идол, а Анета Љумаковска при крајот на концертот ја испеа една од најзначајните песни на Есма на македонски, „Чекај животе“. Во придружба на оркестарот „Титаник“, со дел од репертоарот на Есма настапија и популарнитеи Ервин Аметовски и Бернат Демирали.

Во шестминутен документарец се прикажа мал дел од богатиот живот на Есма. Во својата поема „Кралицата од Маџир Маало“, Реџепова убаво ја опиша новинарката Валентина Парго.

На крајот од концертот, организаторот Зоран Димов пред да ги повика сите пејачи заедно и ја испеаја „Чхајорие шукарије“, во својот поздравен говор рече: „Таа беше жена со големо срце. Ми овозможи да ја сместам телевизијата во просториите на нејзиниот дом. Секогаш ми велеше „ не се грижи, ќе биде добро, ќе успееш, јас сум тука да ти помогнам“. Многу хуманитарни настани организиравме заедно, за сиромашни, болни. Велеше дека богатиот треба да му дава на сиромавиот. Ја сметав за втора мајка– вели Димков. Заедно со сите учесници, за време на целиот концерт, учествуваа членови на ансамблот „Студио фолклор Скопје“, облечени во стилот на Есма.

Импресиите на сите присутни беа едногласни, дека беше многу убаво, и дека Есма заслужува вакви настани традиционално секоја година и во поголем простор.

Настанот го потпомогнаа Министерстовот за култура, како и Градот Скопје. Свој придонес во помагање имаше и ПАКОМАК, а целиот настан го снимаа Телевизија Телма. Фотографиите се дело на фоторепортерот Митко Јанев

СП БТР Продукција заедно со Хуманитарното здружение „Кралицата Есма и Стево Теодосиевски„ во Среда на 22 Ноември во МКЦ , кино „Фросина„ во Скопје со почеток од 19 часот ќе организираат  еден навистина уникатен сценско музичкиот настан „Во спомен на Есма за незаборав„.

Тој настан е на некој начин и годината на одбележување на 80  години од раѓањето на Кралицата на Ромската музика и воедно хуманитарец со големо срце – Кралицата Есма Реџепова Теодосиевска.

На настанот ќе бидат изведени 11 музички нумери од големиот музички опус на Есма Реџепова Теодосиевска во изведба на познати музички имиња од македонската и ромската музичка сцена. Дел од Песните на Есма ќе бидат исполнети од страна на Сузана Гавазова, Анета Љумаковска екс вокалот од групата „Молика„ Рамадан Бислим Рамко Хајрија Бислим, Бернат Демоирали и Ервин Аметовски. На самиот настан ќе биде прикажан краток  документарец на Есма во продукција на СП БТР и  ќе биде прочитана и поема посветена на Есма од страна на новинарката Валентина Парго. 

Овој настан го потпомогнаа и Министерството за култура како и градот Скопје.

На настанот се поканети одреден  број на пријатели и почитувачи на делото на Есма, како и преставници од државата и градот Скопје и дипломатскиот кор.