Стереотипите и предрасудите за Ромите сè уште се живи во македонските медиуми. Еден од тие примери е и случајот со „бездомни Роми го запалија мостот кај Ист Гејт“.

Дел од македонските медиуми објавија „вест“ дека кај месноста Карпалак на автопатот Тетово-Скопје помеѓу десетте загинати бранители од Прилепско кои беа убиени во заседа во оружениот конфликт во 2001 година, се и Ердован Шабаноски и Веби Рушитоски. Меѓутоа, за разлика од загинатите Македонци кои животот херојски го дадоа за Македонија, двајцата Роми од Прилеп всушност животот го дадоа за да „купат коњи и да влечкаат дрва од планините“.

Нема автор(и) на оваа „срцепарателна“ – во основа – националистичка констатација, дека Ердован и Веби животот не го дадоа за државата, туку за да си купат коњи! Оваа „вест“ е објавена лани, но некои медиуми ја преобјавија и оваа година.

„Ердован, заедно со зета си Веби Рушитоски одлучиле да се пријават на мобилизацијата. Со парите сакале да купат коњи и да почнат да работат во шумското, да влечкаат огревно дрво по планината и така да си обезбедат егзистенција“, стои во објавата на повеќе македонски медиуми.

Стереотипите и предрасудите за Ромите сè уште се живи во македонските медиуми

На 16 мај, на сајтот на ТВ Телма е објавена вест со наслов: „Бездомни Роми го запалиле мостот кај Ист Гејт?“ и покрај тоа што во тој момент немаше официјален податок кој го предизвика пожарот.

Оваа вест е коригирана од ТВ Телма и ако денес се побара на нивниот сајт или на гугл пребарувачот ќе се најде вест со наслов: „Група бездомници го запалиле мостот кај Ист Гејт?“. Меѓутоа и покрај корекциите, сепак, пермалинкот остана со првичниот наслов.
Речиси по три месеци, истрагата е во тек и не е откриено од што се запали мостот „Беласица“.

Сè додека во медиумите постојат стереотипи и предрасуди дека Ромите „живеат под мост“, „крадат дрва“, „купуваат и малтретираат коњи“, ќе имаме говор на омраза.

Link: https://civilmedia.mk/natsionalistichki-narativi-namesto-kako-heroi-romite-na-karpalak-zaginaa-za-da-kupat-koni/

Во Чешка сѐ почесто се регистрираат судири меѓу тамошните Роми и украински бегалци. Два изолирани насилни инциденти доведоа до големи антиукраински демонстрации на Ромите

„Украинци, одете си дома!“ „Ова е наша земја!“ „Бараме сигурност!“ Овие слогани ги извикуваа неодамна стотици демонстранти на улиците на чешкиот град Пардубице. Чешките Роми гласно протестираа против украинските бегалци поради тоа што сѐ повеќе се чувствуваат загрозени и маргинализирани.

Претходно дојде и до тепачка меѓу дваесетина Украинци и припадници на чешкото ромско малцинство во градот со 100.000 жители во централна Чешка. Полицијата уапси тројца мажи, еден Ром е префрлен во болница со рана нанесена од нож. Видео снимката од нападот со нож ги обиколи социјалните мрежи.

Ситуацијата во ромската заедница од средината на јуни е напната. Тогаш еден млад Ром во Брно во слична кавга беше убиен од Украинец. И во тој случај дошло до напад со нож. „Напаѓачот бил Украинец кому му пречела гласната музика на млади Роми во трамвај“, пренесе порталот Idnes.cz.

Министерот за правда Павел Блажек меѓутоа ги критикуваше демонстрантите што не го пријавиле својот протест кај властите, со што го прекршиле Законот за собири. „Учествување на протест и повици да се дојде на демонстрација се незаконити. Уставот и законот мора да важат за сите, и за мнозинството и за малцинствата“, порача министерот преку Твитер.

Link: https://www.dw.com/mk/tenzii-megu-ukraincite-i-romite-vo-ceska/a-66201217?maca=maz-rss-maz-all-1489-xml-mrss